Tayland türmisidin késel sewebidin qoyup bérilgen ikki neper Uyghurning iz-dérikining yoqluqi ilgiri sürülmekte

Ixtiyari muxbirimiz haji qutluq qadiri
2017-07-31
Élxet
Pikir
Share
Print
109 Uyghurni taylandtin xitaygha élip mangghan körünüsh. 2015-Yili 9-iyul.
109 Uyghurni taylandtin xitaygha élip mangghan körünüsh. 2015-Yili 9-iyul.
CCTV

Tayland türmiliride tutup turiliwatqan Uyghurlardin yéqinda songkulu ölkisidiki melum bir türmide tutup turiliwatqan ikki neper Uyghur qoyup bérilgen bolsimu, biraq taylanddiki kishilik hoquq pa'aliyetchiliri hazirghiche ularning iz dérikini qilalmighan.

Tayland türmiliride tutup turiliwatqan Uyghurlar mesilisige yéqindin köngül bolup kéliwatqan taylandliq kishilik hoquq pa'aliyetchisi chalida xanim bügün ziyaritimizni qobul qilip taylandning songkulu ölkisidiki melum bir türmide tutup turiliwatqan Uyghurlarning qattiq késelge giriptar bolghanliqini, késili bir qeder éghir bolghan Uyghurlardin ikki nepiri qoyup bérilgen bolsimu, biraq hazirghiche ularning iz-dérikining yoqliqini ilgiri sürdi.

Chalida xanim türmidiki Uyghurlar bilen xelq'ara kishilik hoquq teshkilatlirining uchrishish imkaniyitining bolmaywatqanliqini shundaqla til mesiliside saqchi da'irlirining peqetla özliri belgiligen terjimanlar arqiliq ular bilen söhbetlishishni shert qiliwatqanliqini bildürdi.

U sözide 2015-yili 109 neper Uyghur xitaygha qayturulghandin kéyin taylandta qalghan bir qisim Uyghurlarning songkulu ölkisidiki bir qisim kichik türmilerge ayrim -ayrim halda qamalghanliqin, ular bilen özining körüshüsh imkaniyitining bolmaywatqanliqini ilgiri sürdi.

Kishilik hoquq pa'aliyetchisi chalida xanim:" Türmidiki kishi késelge giriptar bolsa uni tézdin qoyup bérish kérekliki tayland qanunida körsitilgen, shunga saqchi da'iriliri ularni qoyuwétishni oylashqan bolsimu ,biraq tayland hökümitining Uyghur musapirlar toghrisidiki siyasiy meydanining éniq bolmighanliqi sewebidin ularmu amalsizliqta qalghan oxshaydu "-dep alahide eskertti.

Biz kishilik hoquq pa'aliyetchisi chalida xanimning bayanlirigha asasen songkulu ölkilik saqchi idarisige téléfon qilip, bu heqte uchur igilimekchi bolghan bolsaqmu,biraq téléfonimiz jawabsiz qaldi.

Biz tayland bangkok musapirlar idarisige téléfon qilip songkulu ölkisidiki türmidin késel sewebidin qoyup bérilgen ikki neper Uyghur toghrisida so'al sorighinimizda mes'ul xadim bu heqte toxtilip:"Buni eng yaxshisi türme idarisidin tepsili sorap sizge jawab bérey. Men hazir yighinda siz bilen sözlishish imkaniyitim yoq"dédi.

Chet'ellerdiki Uyghur siyasiy közetküchilerning qarishiche,xitay hökümiti tayland türmiliride tutup turiliwatqan Uyghurlarni biraqla,xitaygha qayturup élip kétish arqiliq xelq'ara jemiyetning naraziliqini qozghap qoyushtin ensirep yeng ichide tayland terep bilen kéliship Uyghurlarni bir-ikkidin élip kétish éhtimaliqining yuqirliqini ilgiri sürmekte.

Bu xildiki qarashtikilerdin taylandta xizmet qiliwatqan Uyghurladin abdulbekir bu heqte toxtaldi.

Melum bolushiche, tayland hökümiti 2015-yili, 9-iyul künide taylandta tutup turiliwatqan musapir Uyghurlardin 109 nepirini xitaygha qayturup bergen . Shu küni amérika dölet ishliri ministirliqi bayanat élan qilip tayland hökümitining musapir Uyghurlarni xitaygha qayturup bergenlikini tayland qol qoyghan xelq'ara qanunlargha xilap herket, dep tenqidligen shundaqla bayanatning axirida tayland hökümitini agahlandurup,"Taylandta dawamliq tutup turiliwatqan Uyghurlarning özi xalighan döletlerge kétishige yol qoyushi kérek"dégen.

Yuqiriqi awaz ulinishidin tepsilatini anglang.

Toluq bet