Әхмәт исламға тәблиғ сөзлигәнлики сәвәблик өлүм яки муддәтсиз қамақ җазаси берилгәнлики илгири сүрүлмәктә

Мухбиримизниң заңгуй йезисидин әһвал игилиши давамида мәзкур йезида әхмәт ислам исимлик бир тутқунниң болғанлиқи дәлилләнди. Сақчи вә йәрлик аһалиләрниң әхмәт ислам һәққидә бәргән учурлиридин униңға униңға йеник болғанда муддәтсиз қамақ җазаси берилгәнлики мәлум болди.

Мәлум болушичә, бу йилқи “қаттиқ зәрбә бериш долқуни” да кесиветилгәнләр арисида актип вә шиддәтлик қаршилиқ һәрикәтлиригә қетилғанлар йоқ дейәрлик. Тутқунларниң көп қисми йеқинқи 15 йил ичидә билип-билмәй тәблиғ паалийәтлиригә қетилип қалған вә телефонидин мәсилә көрүлгәнләр икән. Һазирғичә игиләнгән мәлуматларда буларниң көпинчисиниң 10 йиллиқтин артуқ кесилгәнлики мәлум болған болсиму, әң еғир җазаланғанларниң ақивитиниң қандақ болғанлиқи ениқсиз иди. Өткән айда гума наһийисиниң пиялма йезисидики бир кәнт секретари заңгуй йезисидики әхмәт ислам исимлик бир тутқунға тәблиғ сөзлигәнлики сәвәблик өлүм җазаси берилгәнликини баян қилди. 

Йеқинқи 10 йил ичидики җаза һөкүмлири ичидә түрлүк қаршилиқ һәрикәтлиригә четилғанларға, четилиш дәриҗисиниң қанчилик болуши вә яки вәқәдә алған ролиниң қанчилик бөлишидин қәтийнәзәр өлүм җазаси берилгән делолар көп қетим көрүлгән болсиму, әмма шиддәт һәрикәтлиригә четилмиғанлар арисида өлүм җазаси берилгәнләр техи ашкариланмиған иди. Шуңа биз мәзкур учурниң тоғра хаталиқини айдиңлаштуруш үчүн заңгуй йезисиға телефон қилдуқ. Дәсләптә телефонимизни қобул қилған сақчи хадими заңгуйда әхмәт ислам исимлик бир тутқунниң болғанлиқини дәлиллиди, әмма делониң тәпсилатидин мәлумат берәлмиди. Башқа алақидар хадимларму әхмәт исламға өлүм җазаси берилгәнликини дәлиллигүдәк учур бәрмигән болсиму, әмма әхмәт ислам делосини инкар қилмиди. 

Аһалиләрдин бириниң баян қилишичә, әхмәт ислам заңгуй йезисиниң 6‏-кәнт әзаси. Бу йил 40 яшниң үстидә болған әхмәт ислам, 3 пәрзәнтниң атиси; униң үстидин җаза һөкүми чиқирилғанлиқи һәққидә, кәнт аһалиләр комитети йиғинида мәлумат берилгән. 

Пиялимадики бир кәнт секретари әхмәт исламға муддәтсиз қамақ җазаси берилгәнлик еһтималлиқини тилға алди.