Tyen'enmin hujumchilirining kimlikliri heqqide bir qisim melumatlar ashkarilandi

Muxbirimiz shöhret hoshur
2013-11-01
Share
xitay-saqchi-maniwer-urumchi-305.jpg Xitay qoralliq küchliri xitay dölet bayrimi harpisida térrorluqqa qarshi manéwir élip bardi. 2010-Yili 30-séntebir, ürümchi.
AFP


Tyen'enmén'ge hujum qilghuchilardin osman hesen we anisi quwanxan réhimning aqtu nahiyisidin ikenliki élan qilin'ghandin kéyin, muxbirimiz aqtu nahiyisige téléfon qilip, da'iriler we ahalilerdin ehwal igilidi.

Melum bolushiche, bu yil 33 yashqa kirgen osman hesen, aqtu nahiyisining üzhme yéza 3 - kent 8 - guruppisidin bolup, u 1992 - yili aqtudin ayrilip ürümchi we xitay ölkiliride tijaret bilen shughullan'ghan. U aqtugha axiriqi qétim 2007 - yili kelgen. Quwanxan réhim bolsa uruq - tughqanlirigha ürümchige dawalan'ghili baridighanliqini éytip, bu yil 9 - ayning axiri yurtidin ayrilghan.

Bu heqtiki tepsiliy melumatlarni muxbirimiz shöhret hoshurning töwendiki programmisidin anglaysiler.

Aqtuning jamaltérek yézisining kent bashliqi, tyen'enménde weqe yüz bergen kunning etisi yeni seyshenbe küni yézida yighin échilip weqening özlirige uqturulghanliqini we bir qatar orunlashturushlarni élip barghanliqini bayan qildi. Kent bashliqining bildürüshiche, yéza rehberliri, weqening bash - axirini tepsiliy we toluq démigen, peqet 3 kishining béyjingda weqe chiqirip qoyghanliqini we uch kishining qizilsu oblastigha, ikki kishining bolsa, aqtuning üzhme yézisigha tewe ikenlikini ashkarilighan. Orunlashturushqa asasen, herqaysi kentler öz tewelikidin ichkiri ölkilirige ketken kishilerni tizimlighan. Ularning turushluq adrisi, téléfon nomurliri qatarliq uchurlarni toplap j x organlirigha tapshurghan. Melum bolushiche, herqaysi kentlerde 28 - öktebirdin bashlap nöwetchilik tüzümi yolgha qoyulup yézigha kirgenler we chiqqanlar tizimlanmaqta we nazaret qilinmaqta.

Üzhme yézisining bashliqi ziyaritimizni qobul qilip töwendikiche melumat berdi:

So'al: tyen'enménde weqe yüz bergendin kéyin néme ishlarni qiliwatsiler?

Jawab: yuqirining orunlashturushi boyiche öy tekshürüsh élip bériwatmiz, ichkiri ölkilerge ketkenlerni tizimlawatimiz.

So'al: tyen'enmén weqesige chétishliq osman hesen yézanglarning qaysi kentidin?

Jawab: 3 - kent 8 - guruppisidin.

So'al: osman hesen néme ishlar bilen shughulliniwatqan?

Jawab: u 1992 - yili yurtni tashlap chiqip ketken, shuningdin buyan ichkiri ölkilerde, shinjangning herqaysi jaylirida aqma nopus bolup tijaret qilip yurüwatqan. Ürümchide bir mezgil ashxana achqanliqidin xewirimiz bar, ichkiride néme ish qilghanliqini bilmeymiz. U axiriqi qétim 2007 - yili yurtqa bir qétim kelgenken, 2 - qétimliq salahiyet kénishkisi tarqitishta u özi bolmighachqa we iltimas sunmighachqa j x tarmaqliri nopusinimu öchürüwetken iken.

So'al: osman hesenning a'ilisining shexsiy bir ziyankeshlikke uchrighan yaki hökümettin narazi bolghan terepliri barmidi?

Jawab: bizning tekshürüshlirimizde u terepliri bayqalmidi, j x tarmaqliri bilemdu - yoq uqmaymen.

So'al: osman hesen anisi quwanxan réyimni dawamliq yénida élip yüremtiken yaki mushu qétim weqe waqtidila jem boptimu?

Jawab: ürümchige dawalan'ghili barimen, oghlum ürümchide ashxana échiwatidu, dep 9 - ayning axiriliri yurttin ayrilghan iken.

So'al: osman hesenning anisi mijez - xaraktéri jehette qandaq bir ayal idi?

Jawap: bu tereplirini men bek bilip kentmeymen, kent mes'ulliri bildu.

Hörmetlik radi'o anglighuchilar, yuqirida tyen'enmin hujumchilirining kimlik we hayati heqqide igiligen deslepki melumatlarni diqqitinglargha sunduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet