Toqsu nahiyeside ündidarda diniy mezmundiki tékist yollighan bir yash 15 kün qamaqta yatqan

Ixtiyariy muxbirimiz qutlan
2014.04.24


Igilishimizche, aqsu wilayitining toqsu nahiyeside olturushluq bir Uyghur yash özining ündidardiki dostlar chembirikige diniy mezmundiki tékist yollighanliqi seweblik 15 kün qamaqta yatqan.

Toqsu nahiyesdin aqsu shehirige qatnaydighan yoluchilar minibusini heydeydighan bu yash yéqinda radi'omiz ziyaritini qobul qilip öz béshidin kechürgenlirini bayan qildi.

“Bu, ötken yili 10 - ayning 17 - küni yüz bergen ish idi, - dédi u téléfon ziyaritimiz jeryanida, - biz adette ündidar arqiliq alaqe qilidighan dostlar chembiriki qurghan iduq. Bezi uchurlarni öz - ara yolliship, dostlar ortaq behriman bolattuq. Bir küni tuyuqsizla toqsu nahiyelik jama'et xewpsizliki idarisidin méni chaqirip téléfon qiptu. Néme ish bolghanliqini bilelmey saqchi idarisige bardim. Ular sen téléfonda néme yolliding dep qopalliq bilen soraq qilishqa bashlidi. Men ulargha ündidarda özüm qiziqidighan diniy tebligh mezmunidiki bir tékistni yollighan idim. Buning néme yamini bar désem, ular bu dégen qanunsiz qilmish dep méni 15 kün solap qoydi.”

U yene munularni bildürdi: “Solaqxanida 15 kün yétip qaytip chiqsam, ayalimni tutup qamaptu. Néme ish bolghanliqini sorisam, saqchilar ayaling uzun diniy kiyim kiyidiken, bumu qanonsiz qilmish, shunga tuttuq deydu. Men bu zulumgha zadila chidimay qaldim - de shu küni erz qilish üchün ürümchige mangdim. Men solaqtiki waqitta saqchilar téléfonimni tartiwalghan idi, ichige iz qoghlash apparati békitip qoyghanmu, kucha ayrodromigha bérishimgha arqamdin saqchilar qoghlap bérip tutup ekeldi.”

U özi duch kelgen ehwallar heqqide toxtilip yene mundaq dédi: “Men bir shopur, toqsu nahiyesidin aqsu shehirige yoluchilar minibusi heydeymen. Bezide uzun kiyim kiyip yüzini yögigen ayallar aptobusqa chiqidu. Bikettin mangay dések, xenzu xadimlar aldimizni tosup, diniy kiyim kiygen ayallarni aptobusqa sélipsen dep mangghili qoymaydu. Ular bilen gep talashsaq, kinishkimizni tartiwalidu. Aqsu shehirige kirishimizge yene saqchilar tosup, birmu - bir tekshüridu. Yénimizdiki qoghun - tawuz tilip yeydighan kichik bekimizge qeder tartiwalidu. Ishqilip biz haywanning künini körüwatimiz!”

U axirida yene munularni bildürdi: “Bizning bu toqsu we shayar nahiyeliride bu ishlar shunchilik ching we shunchilik qattiq. Anglisaq bashqa jaylarda unchilik emes deydu. Bizning bu ikki nahiyede ayrim qanun barmu yaki bashqa sewebmu héch bilmiduq.”

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.