193 Ming nopusluq toqsu nahiyiside 22 ming kishining lagérda ikenliki ashkarilandi

Muxbirimiz shöhret hoshur
2018-08-17
Élxet
Pikir
Share
Print
Xotendiki melum yépiq terbiyelesh orni.
Xotendiki melum yépiq terbiyelesh orni.
Social Media

Muxbirimizning toqsu nahiyisige qarita élip barghan téléfon ziyaretliri dawamida 193 ming nopusluq bu nahiyide 3 orunda yighiwélish lagéri barliqi, bularda jem'iy 22 ming kishining "Terbiye" liniwatqanliqi ashkarilandi. Melum bolushiche, lagérlardin biri nahiye baziridin birqanche kilométir uzaqliqtiki ambar dep dep atilidighan jaygha qurulghan iken. Buningdin bashqa nahiyilik 1‏-ottura mektep bilen partiye mektep lagér ornida ishlitilmektiken.

Hörmetlik radi'o anglighuchilar, toqsu nahiyilik hökümet tor bétide 2017-yilliq nopus statistikida mezkur nahiyening omumiy nopusi 193030 dep körsitilgen. Biz nopusning mutleq köpchilikini Uyghurlar igileydighan bu nahiyide zadi qanche yighiwélish lagérining barliqi we uningda qanchilik kishining solinip yatqanliqi heqqide melumat élish üchün toqsu nahiyilik j x idarisige téléfon qilduq.

Xadimlarning beziliri bu heqte melumat bérishke hoquqluq emeslikini bildürdi. Beziliri bolsa konkrét melumatlardin xewersizlikini éytti. Yene beziliri bu heqtiki uchurlarni ashkarilimasliq heqqide yuqiridin uqturush barliqini éytti. Beydu uchur ambirida tonushturulushiche, toqsu nahiyisi 3 bazar, 5 yézidin teshkillen'gen iken. Bular toqsu baziri, yultuzbagh baziri, ich'ériq baziri, peyshenbebazar yézisi, tash'ériq yézisi, iken yézisi, üch'östeng yézisi we tamtoghraq yézisidur.

Biz lagérlarning orni we sani heqqide melumat élish üchün herqaysi yéza-bazar saqchixanilirighimu téléfon qilduq. Xadimlardin biri özi tewe yézidiki ahalilerning 2 ‏-terbiyilesh lagérigha, yeni toqsu bazar etrapidiki ambar dégen jaygha tesis qilin'ghanliqini ashkarilidi. Melum bolushiche, toqsu nahiyilik 1‏-ottura mektepmu oqughuchiliri 2‏-ottura mektepke yötkiwétilgendin kéyin lagér ornida ishlitilmektiken. Yene uning bayan qilishiche, bu nahiyide dölet ishchi-xizmetchiliride atalmish "Terbiyilesh" ke ekitilgenler nahiyilik partiye mektipige jaylashturulghan. Saqchi xadimlirining bayanliridin melum bolushiche, ilgiri tash'ériq yézisidimu bir lagér qurulghan. Kéyinche bu lagérdikiler nahiye baziridiki 3-lagérgha yötkiwétilgen. Xadimlar toqsu nahiyiside yighiwélish lagérigha adem apirilghandin buyan, qoyup bérilgenlerning asasen dégüdek bolmighanliqini, hazirghiche bu 3 lagérda jem'iy 22 ming kishining solinip yatqanliqini ashkarilidi.

Saqchi xadimining bayanliridin melum bolushiche, bu 22 ming dégen san kechliri öylirige qaytishqa bolidighan "Ochuq terbiye" lagéridikilerni we jaza mudditi békitilip késiwétilgenlerni öz ichige almaydiken.

Toluq bet