Хитай даирилири түркийә вәтәндиши абдуллаҗанниң җәситини аилисигә қайтурушни рәт қилған

Мухбиримиз қутлан
2014-10-30
Share
abdullajan-turkiye-wetendash-turme-olush.jpg Гваңшиниң пиңшяң түрмисидә сирлиқ һалда қаза қилған, түркийә вәтәндиши 21 яшлиқ уйғур йигит абдуллаҗан абдулмәннан.
Сүрәтни абдуллаҗанниң дадиси абдулмәннан тәминлигән

Өктәбирниң башлирида түркийә вәтәндашлиқидики 21 яшлиқ уйғур йигит абдуллаҗан гваңшиниң пиңшяң түрмисидә сирлиқ һалда қаза қилғандин кейин, түрмә даирилири униң җәситини туғқанлириға беришни рәт қилған.

Игилишимизчә, 9-өктәбир күни абдуллаҗанниң йәкәндики уруқ-туғқанлири гваңши өлкисидин кәлгән бир җиддий телефонни тапшурувалған. Униңда 9 айдин буян пиңшяң түрмисигә қамалған яш абдуллаҗанниң туюқсиз кесәллик сәвәби билән қаза қилғанлиқи уқтурулған.

Мәрһум абуллаҗанниң түркийәдә олтурушлуқ дадиси абдулмәннан қари бүгүн иккинчи қетим зияритимизни қобул қилип, пиңшяңдики түрмә даирилириниң оғлиниң җәситини туғқанлириға қайтуруп бәрмигәнликини билдүрди.

Униң билдүрүшичә, йәкәндики уруқ-туғқанлиридин 4 киши шу вақитниң өзидә, мәрһум абдуллаҗанниң җәситини қайтуруп келиш үчүн гваңшиға барған. Әпсуски, пиңшяң шәһәрлик түрмә даирилири абдуллаҗанниң җәситини қайтурушни рәт қилған.

Түрмә даирилири уларға: "пиңшяң шәһири вийетнам чеграсиға җайлашқан сәзгүр район. Шу сәвәбтин бу йәрдин һәрқандақ нәрсини, болупму җәсәтни йөткәп кетишкә болмайду" дегән.

Түрмә тәрәп йәнә, мәрһумниң уруқ-туғқанлиридин йәрлик сетивелиш үчүн 125 миң сом, мейитни дәпн қилиш һәққи үчүн 25 миң сом болуп җәмий 150 миң сом пул төләшни ейтқан.

Мәрһум абдуллаҗанниң туғқанлири буниңға етираз билдүрүп түрмә даирилири билән талаш-тартиш қилишқан. Улар даириләргә мундақ дегән: "балиниң өз ата-аниси чәтәлдә. Униң үстигә, мәрһум абдуллаҗанму түркийә вәтәндашлиқиға өткән киши. Униң йәрлики үчүн биз пул төлийәлмәймиз. Болмиса, мейитни бизгә қайтуруңлар, юртимизға апирип өз қаидимиз бойичә йәрликкә қойимиз."

Түрмә даирилири ахирида мәрһум абдуллаҗанниң йәрлики вә уни дәпн қилиш һәққи үчүн пул алмайдиғанлиқини ейтқан. Вәһаләнки, мәрһумниң уруқ-туғқанлириға өлүм сәвәби вә җәсәтниң әһвали һәққидә еғиз ачмаслиқ һәққидә шәрт қойған.

Амалсиз қалған уруқ-туғқанлар ахирида түрмә даирилириниң орунлаштуруши бойичә, абдуллаҗанниң мейит намизини пиңшяңдики туңганлар мәсчитидә чүшүрүп, шу җайдики мусулманлар қәбристанлиқиға дәпн қилған.

Мәрһумниң түркийәдики дадиси абдулмәннан қари зияритимиз җәрянида йәнә мунуларни билдүрди:
"оғлумниң җәсити шундақ қилип пиңшяңдики мусулманлар қәбристанлиқиға дәпн қилинипту. Уруқ-туғқанлар мейитни суға елиш җәрянида бәдинини тәкшүрүп көргәнликини ейтти, әмма бу һәқтә телефонда маңа һечнемә дейәлмиди. Мениң бу һәқтә сориған соалимғиму җаваб бәрмиди. Мән уларниң һөкүмәтниң бесими астида телефонда бу тоғрилиқ гәп қилиштин қорқуватқанлиқини уқуп турдум."

У йәнә мунуларни билдүрди:
"оғлум 3 яш вақтида вәтәндә қәп қалған. 18 Йилдин кейин йигит болуп түркийә вәтәндашлиқиға өткән бир вақитта униңдин мәңгүгә җуда болдуқ. Бу йил 1-айниң 27-күни оғлум ханой хәлқара айродромида вийетнам сақчилири тәрипидин гуман билән тутуп кетилгәндин кейин, хитайға өткүзүп берилгән икән. 9 Айдин буян пиңшяң түрмисидә қамақта ятти. Түркийә һөкүмитигә бу һәқтә көп қетим әрз йезип әһвални дегән болсақму, лекин һечқандақ үнүми болмиди. Мана, түркийә вәтәндашлиқиға өтүп болған балам хитай түрмисидә өлди. Тирикидә һечким игә болмиған турса, өлгәндә ким игә чиқатти!?..."

Тәпсилатини аваз улиништин аңлиғайсиз.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт