Sériqbuya weqesi türkiye parlaméntidiki yighinda otturigha qoyuldi

23 - April küni maralbéshi nahiyisining sériqbuya bazirida meydan'gha kelgen weqede 12 kishining ölgenliki, köp sanda kishining tutup kétilgenliki toghrisidiki xewer türkiye parlaméntidimu ghulghula peyda qildi.

Ötken hepte türkiye milletchi heriket partiyisining bezi parlamént ezaliri sériqbuya weqesi heqqide munazire élip bérip hökümetni xitayni eyibleshke chaqirghan. Parlamént ezasi sinan oghanning radi'omizgha bergen bayanatigha asaslan'ghan bu hepte aldimizdiki hepte sériqbuya weqesini türkiye parlaméntining kéngeytilgen yighinida otturigha qoyidiken.

Parlamént ezasi sinan oghan ependi sériqbuya weqesidiki xitayning qattiq qolluq siyasitini qattiq eyipleydighanliqini bayan qilip mundaq dédi:

“Sherqiy türkistanda xitayning bésim siyasiti we zulumi dawamlishiwatidu. Epsuski weqedin kéyin xitay hökümiti Uyghurlarni tutqun qilishni dawamlashturiwatidu. Epsuski türk hökümiti xitaygha inkas qayturmaywatidu. Biz milletchi heriket partiyisi bolush süpitimiz bilen türk musuluman Uyghur xelqini qollap quwwetleymiz. Xitayning hazirqi sherqiy türkistan siyasitini qattiq eyibleymiz.”

Sinan oghan ependi ötken hepte sériqbuya weqesining türkiye parlaméntida otturigha qoyulghanliqini bayan qilip mundaq dédi:

“Ötken hepte türkiye parlaméntida bu mesile otturigha qoyuldi. Bu hepte we kélidighan heptidimu küntertipke élip kélimiz. Bu mesilige türk hökümitimu inkas qayturushi kérek.”

Biz bu heqte köz qarishini élish üchün d u q re'isi rabiye qadir xanimning orunlashturushi bilen enqerege kélip hökümet xadimlirigha sériqbuya weqesi heqqide doklat sun'ghan séyit tümtürk ependige mikroponimizni uzattuq.