Түркийәниң әрзурум вә қәйсәри шәһәрлиридә наразилиқ паалийәтлири өткүзүлди

Ихтиярий мухбиримиз әркин тарим
2014-01-13
Share
seyit-tumturk-zhurnalistlar-jemiyiti-uyghur-doppa.JPG Сейит түмтүрк әпәнди қәйсәри журналистлар җәмийитиниң рәиси вәли алтинқая әпәндигә уйғур допписи тәқдим қиливатқан көрүнүш. 2014-Йили 10-январ, түркийә.
RFA/Erkin Tarim

Дуня уйғур қурултийиниң чақириқиға бинаән қәйсәридә паалийәт елип бериватқан шәрқий түркистан мәдәнийәт вә һәмкарлиқ җәмийити қәйсәридә, “өтүкән” журнили түркийәниң шәрқигә җайлашқан әрзурум шәһиридә хитайға қарши наразилиқ паалийити өткүзди.

Шәрқий түркистан мәдәнийәт вә һәмкарлиқ җәмийити рәиси сейит түмтүрк, баш катипи абдулһәким сәлчуқ, муавин рәис әмруллаһ әфәндигил әпәнди, “көкбайрақ” журнили тәһрири дурсун сүйдүнлү қатарлиқ кишиләрдин тәркиб тапқан һәйәт 10-январ күни қәйсәри журналистлар җәмийитидә мухбирларни күтүвелиш йиғини чақирди. Һәйәтни қәйсәри журналистлар җәмийитиниң рәиси вәли алтинқая әпәнди қизғин күтүвалди. Сейит түмтүрк әпәнди қәйсәри журналистлар җәмийитиниң рәиси вәли алтинқая әпәндигә уйғур допписи вә көкбайрақ журнили тәқдим қилди. Арқидин мухбирларни күтүвелиш йиғини өткүзүлди.

Көп санда телевизийә, гезит вә журналларниң мухбирлири қатнашқан мәзкур мухбирларни күтүвелиш йиғинида, сейит түмтүрк әпәнди, хитай һөкүмитиниң бигунаһ уйғурларни әсәбий динчи, бөлгүнчи дәп әйибләп қәтли қиливатқанлиқини, шәрқий түркистанда мәйданға келиватқан вәқәләрни дуняға террорчилиқ вәқәси дәп аңлитиватқанлиқини ейтти. У, мухбирларға бәргән баянатида, хитай компартийисиниң уйғурларға елип бериватқан бесим сияситиниң 64 йилдин буян давамлишиватқанлиқи, уйғурларниң һечқачан хитайниң бу мустәмликә сияситигә боюн әгмигәнликини баян қилди.

Тор гезитлиридә елан қилинған хәвәрләргә асасланғанда, шәрқий түркистан мәдәнийәт вә һәмкарлиқ җәмийити рәиси сейит түмтүрк әпәнди мухбирларни күтүвелиш йиғинида йәнә көплигән мәсилиләрни оттуриға қойған.

11-январ күни түркийәниң шәрқидики әрзурум шәһириниң мәркизигә җайлашқан лалапаша мәсчитиниң алдида хитайға қарши наразилиқ намайиш өткүзүлди. “өтүкән” журнилиниң әрзурумда турушлуқ вәкиллири тәрипидин уюштурулған бу намайишқа көп санда киши қатнашти. Намайишта мухбирларға мәтбуат баянати оқуп өтүлди. Улар баянатта алди билән шәрқий түркистанниң, уйғур идиқутлуқи, қараханийлар сулалиси, сәйидийиләр дөлити вә шәрқий түркистан җумһурийәтлиригә игә болған түркләрниң ата юрти икәнликини, хитайларниң уйғурларға елип бериватқан бесим сияситини тохтитишини тәкитлиди. Улар мухбирларға бәргән баянатида йәнә түрк һөкүмитини тили вә дини охшаш болған уйғурларға игә чиқишиниң шәрт икәнликини әскәртти. Намайишчилар қоллирида, түркийәниң байриқи билән уйғурларниң айюлтузлуқ көк байриқини көтүргән һалда намайиш мәйданидин узақлашти. Бу паалийәт түрк ахбарат васитилиридиму орун алди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт