Türkiyening enqere we alanya sheherliride Uyghurlar toghrisida pa'aliyetler ötküzüldi

3-Chésla xitayning enqerede turushluq elchixanisi aldida namayish, 4-chésla bolsa türkiyening sayahet sheherliridin biri bolghan alanya shehiride “Sherqiy türkistanning hazirqi weziyiti” toghrisida doklat bérish yighini ötküzüldi.

2015-Yili 1-ayning 3-küni bir guruppa türk yashliri qollirida ay yultuzluq kök bayraq, türk bayriqi we lozunkilarni kötürgen halda xitay elchixanisining aldida namayish ötküzdi. Namayishchilarning köpi yashlardin terkib tapqan bolup, axbarat bayanatini oqushtin burun, özlirining héchqandaq partiye we teshkilatqa eza emes, yashlar ikenlikini, peqetla Uyghur qérindashlirini qollash xitayning Uyghurlargha élip bériwatqan bésim siyasitini eyiblesh üchün xitay elchiliki aldigha kelgenlikini bayan qildi.

Aldi bilen namayishchilarning wekili axbarat bayanatini oqup mundaq dédi:
“Qimmetlik türk milliti, ötken yili 3-ayda taylandqa hijret qilghan Uyghur qérindashlirimizning kommunist xitay teripidin élip kétilip öltürülmesliki üchün biz héchqandaq ammiwi teshkilatqa eza bolmighan awam xelq bolush süpitimiz bilen bu yerge jem bolduq.”

Namayishchilarning bayanatchisi bayanatining axirida türk hökümitini Uyghurlargha ige chiqishqa chaqirip mundaq dédi:
“Türkiyege, dunyadiki tesirlik teshkilat we idare-jem'iyetlirige yene bir qétim chaqiriq qilimizki, dunyaning közining aldida exlaqsizliq bilen élip bériliwatqan adem etkeschilikini toxtatsun. Aghzinglardin chüshürmey dep kéliwatqan insan heq-hoquqliri depsende boluwatqan bügünki künde, bigunah bir millet irqiy qirghinchiliqqa uchrawatqanda qarap turushunglar bekla külkilik we ikki yüzlüktin bashqa nerse emes. Her da'im bichare ézilgen musapirlargha ishikini achqan dölitimizning Uyghur qérindashlirimizghimu dölitimizning ishikini achidighanliqigha ishenchimiz kamil.”

Namayish axirlashqandin kéyin qolida ay yultuzluq kök bayraq, türk bayriqi we her xil lozunkilarni kötürüwalghan 90 etrapida namayishchi “Hökümet uxlima Uyghurlargha ige chiq”dégendek sho'arlarni towlighan halda ayrildi.

1-Ayning 4-küni yekshenbe küni kechte türkiyening sayahet sheherliridin biri bolghan alanyada “Sherqiy türkistanning hazirqi weziyiti” mawzuluq doklat bérish yighini chaqirildi. Türkiye büyük birlik partiyesining yashlar yachéykisi bolghan alperen ojaqliri uyushturghan doklat bérish yighinida, dunya Uyghur qurultiyi mu'awin re'isi doklat berdi. Ikki sa'et dawamlashqan doklat bérish yighinigha alanyadaki her qaysi siyasiy partiyeler, ammiwi teshkilat mes'ulliri we Uyghurlarning dostliridin bolup, 400 etrapida kishi qatnashqan. Doklat bérish yighini axirlashqandin kéyin séyit tümtürk ependi alanya rayonida tarqitilidighan téléwiziyening ziyaritini qobul qilghan. Doklatta nuqtiliq halda Uyghurlarning hazirqi weziyiti anglitilghan.