Türkiyening sabiq dölet re'isi abdullah gül Uyghur musapirlar toghrisida melumat aldi

Ixtiyariy muxbirimiz erkin tarim
2015-03-03
Share
abdullah-gul-seyit-tumturk.JPG Türkiye dölet re'isi abdullah gül qeyseri erkilet ayrodromida d u q mu'awin re'isi séyit tümtürkni qobul qilip, malayshiya arqiliq qeyserige kelgen Uyghur musapirlar toghrisida melumat igilimekte. 2015-Yili 26-féwral, türkiye.
RFA/Erkin Tarim

Türkiye dölet re'isi abdullah gül 26-féwral küni chüshtin kéyin qeyseri erkilet ayrodromida d u q mu'awin re'isi séyit tümtürkni qobul qilip, malayshiya arqiliq qeyserige kelgen Uyghur musapirlar toghrisida melumat igiligen.

15 Minut dawamlashqan bu uchrishishta séyit tümtürk ependi, türkiyening sabiq dölet re'isi abdullah gülge qeyserige 800 etrapida musapir Uyghurning orunlashturulghanliqini, bu Uyghurlargha qeyseri waliy mehkimisi, qeyseri sheherlik hökümitining shundaqla qeyseri xelqining yardem qilishi bilen hazir ularning héchqandaq qiyinchiliqining qalmighanliqini éytqan. Séyit tümtürk ependi sözining axirida xitayning zulumining künsayin küchiyiwatqanliqini, xitayning Uyghurlarning tilini we dinini cheklesh siyasitining téximu kücheygenlikini türkiyening bu toghriliq xitay döliti bilen sözlishishi kéreklikini éytqan.

Dölet re'isi abdullah gül, séyit tümtürkning Uyghurlar toghrisida bergen melumatini anglighandin kéyin mundaq dégen: “Qeyserige kelgen Uyghur musapirlarning xatirjem bolushi üchün dölet we xelq öz burchini ada qilidu, Uyghurlar bilen türkler tili, dini we örp-aditi oxshash qérindash millet. Bizmu bundin ming yil burun shu zémindin kelgen, shunga türk döliti, türk xelqi Uyghur qérindashlirimiz üchün qolimizdin kelgenni qilimiz.”

Abdullah gül 2007-yili 8-ayning 28-künidin 2014-yili 8-ayning 28-künigiche türkiye jumhuriyitining dölet re'islik wezipisini ötidi. U, bu jeryanda 2009-yili 6-ayda ürümchini ziyaret qildi, 5-iyul ürümchi weqesi bolghanda qeyseridiki Uyghur mehellisige bérip Uyghurlardin hal soridi. 2014-Yili qurban héytida Uyghur shéhitlargha atap qurbanliq qildi. Türkiyening sabiq dölet re'isi abdullah gül türkiyede Uyghur mesilisini eng yaxshi bilidighan aliy rehberlerdin biri hésablinidu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet