Kümüshxana uniwérsitétida "Yüksiliwatqan xitay we sherqiy türkistan mesilisi" témisida doklat bérish yighini ötküzüldi

Ixtiyariy muxbirimiz erkin tarim
2016-04-19
Élxet
Pikir
Share
Print
Xajettepe uniwérsitéti oqutquchisi doktor erkin ekrem "Yüksiliwatqan xitay we sherqiy türkistan mesilisi" mawzuluq doklat bermekte. 2016-Yili aprél, türkiye.
Xajettepe uniwérsitéti oqutquchisi doktor erkin ekrem "Yüksiliwatqan xitay we sherqiy türkistan mesilisi" mawzuluq doklat bermekte. 2016-Yili aprél, türkiye.
RFA/Erkin Tarim

Türkiyening her qaysi uniwérsitétlirida Uyghur mesilisige bolghan qiziqish künsayin kücheymekte. 4-Ayning 18-küni türkiyening sherqiy shimaligha jaylashqan kümüshxana shehiridiki kümüshxana uniwérsitétida "Yüksiliwatqan xitay we sherqiy türkistan mesilisi" témisida doklat bérish yighini ötküzüldi.

Yighin'gha kümüshxana uniwérsitéti mes'ulliri, herqaysi fakultétlarning mudirliri, oqutquchi we oqughuchilar, siyasiy partiye mes'ulliri we ammiwi teshkilatliri mes'ulliridin bolup 400 etrapida kishi qatnashti.

Yighin türkiye jumhuriyiti dölitining dölet marshini oqush bilen bashlandi. Arqidin doklat bérish yighinini uyushturghan kümüshxana uniwérsitéti yash atilim kulubi mes'uli oghuzxan budaq ependi échilish nutqi qildi. U, aldi bilen yighin'gha ishtirak qilghan kishilerge salam we éhtiramini bildüridighanliqini bayan qilip mundaq dédi: "Hörmetlik uniwérsitét mudirimiz, hörmetlik herqaysi fakultét mudirliri, hörmetlik oqutquchilar, hörmetlik herqaysi siyasiy partiye mes'ulliri, hörmetlik méhmanlar we oqughuchilar hemminglargha hörmet bilen salimimni bildürimen. Biz yash atilim qulubi uyushturghan "Untulmighan weten sherqiy türkistan" mawzuluq doklat bérish yighinigha xush keldinglar."

U échilish nutqida Uyghurlar heqqide melumat bérip mundaq dédi: "1949-Yilidin bériqi 60 yildin buyan Uyghur xelqi éghir bésim ichide turmush köchürüshke tirishmaqta. Dinni epyün dep kelgen xitay sherqiy türkistandiki musulmanlargha qarita dinsizlashturush siyasiti yürgüzmekte. Din we étiqad erkinliki cheklen'gen, hijap kiyish cheklen'gen, saqal qoyush cheklen'gendin sirt, ularning normal turmush köchürüsh erkinlikimu yoq. Ramzan éyida rozi tutush cheklen'gen. Xitay döliti Uyghur qérindashlirimizni térrorchi dep qalpaq kiydürüp jazalandurmaqta. Bizning bügünki doklat bérish yighinimizda xitayning Uyghur siyasiti, sherqiy türkistanning istratégiyelik ehmiyiti we türkiye-xitay munasiwitide sherqiy türkistan mesilisi toghrisida etrapliq melumat bérilidu."

Xajettepe uniwérsitéti oqutquchisi doktor erkin ekrem "Yüksiliwatqan xitay we sherqiy türkistan mesilisi" mawzuluq doklatida tereqqiy qiliwatqan xitayda Uyghur diyarining istratégiyilik ehmiyiti we xitayning Uyghurlargha élip bériwatqan bésim siyasiti toghrisida melumat berdi. U, xitay dölitining éghir bésim siyasiti élip bérishidiki eng muhim seweblerdin birining sherqiy türkistanning istratégiyilik qimmitining yuqiri ikenlikini tekitlidi.

Biz yighin axirida doktor erkin ekremgimu mikrofonimizni uzattuq. U, Uyghur mesilisini türkiyening muhim bir mesilisige aylandurush üchün türklerge toghra melumat bérishning muhim ikenlikini tekitlidi.

Burun Uyghurlargha uniwérsitétlardiki, til, tarix we edebiyat kesipliride oquydighan oqughuchilar köprek qiziqatti, hazir bolsa xelq'ara munasiwet, iqtisad, idare bashqurushqa oxshash kesiplerdiki oqughuchilarmu Uyghur mesilisige qiziqmaqta we bu heqte doklat bérish yighinliri uyushturmaqta. Bir hepte burun türkiyening gherbiy rayonida Uyghurlar toghrisida yighin uyushturulghan idi. Bügün bolsa türkiyening sherqiy shimal chégra rayoni hésablinidighan kümüshxanida ötküzüldi.

Toluq bet