Erzdar tursun ghopur tashqorghanda 14 kün tutup turulghan

Muxbirimiz shöhret hoshur
2013-02-22
Élxet
Pikir
Share
Print
Süret, 2010 - yili 18 - awghust, uyghur erzdar tursun ghopur béyjingdiki melum köwrük astida boshün tori muxbirining ziyaritini qobul qiliwatqandiki körünüshi.
Süret, 2010 - yili 18 - awghust, uyghur erzdar tursun ghopur béyjingdiki melum köwrük astida boshün tori muxbirining ziyaritini qobul qiliwatqandiki körünüshi.
www.peacehall.com Din élindi.

Béyjingdiki Uyghur erzdarlardin tursun ghopur, kechürmishlirini izchil halda axbaratqa ashkarilap kéliwatqanlardin biri, u radi'omiz ziyaritini köp qétimlap qobul qilghandin bashqa, los anjélis waqti géziti qatarliq xelq'ara axbarat wastiliri we böshün qatarliq xitayche xewer torliriningmu ziyaritini qobul qilip, Uyghur rayonidiki jiddiy we nazuk mesililerni pash qilip kelgen.

Shunga xitay da'iriliri yéqinqi 18 - qurultay harpisida uni béyjingdin tutup eketkende, muxbirlar bilen uchrashturmasliq üchün, öyige aparmastin udul tashqorghan'gha apirip, tashqorghanda 14 kün tutup turghan. Bu jeryanda uni 6 kishi kün boyi nazaret qilghan.

Töwende bu heqte tepsiliy melumat anglaysiler, bu programmini muxbirimiz shöhret hoshur teyyarlidi.

So'al: tashqorghanda qanche kün tutup turuldingiz?

Jawab: jem'iy 14 kün.

So'al: tutup turulghan yéringiz qamaqxanimu, doxturxanimu, qandaq bir yer?

Jawab: yéza sékritarlirining öyi. Bir küni bir yéza sékritarining öyide, yene bir küni yene bir sékritarning öyide...Jidelleshsem, yéza bazarlirigha abpridu, bolmisa öydin talagha chiqarmaydu.

So'al: sizni nazaret qilghanlar kimler?

Jawab: yéngisheher nahiyilik partkomning siyasiy qanun'gha mes'ul sékritari, nahiyilik hökümetning erziyet idare bashliqi qatarliq 6 kishi.

So'al: ular 14 kün dawamida sizni tutup turushtin bashqa ish qilmidimu?

Jawab: yaq, qilmidi. Ular "Yuqiridin 18 qurultay axirghiche séni béqishimizni orunlashturdi. Qurultay axirlashqiche sanga qaraymiz, sen néme yéseng shuni yeymiz, ölseng bille ölimiz, bu yuqirining orunlashturushi, bizningmu amalimiz yoq" déyishti.

So'al: nime üchün sizni öyingizge aparmay, yaki qamaqqa solimay, tashqorghan'gha apiridu, sewebini sorap baqtingizmu?

Jawab: sorudum. Sorisam "Yézanggha apirip qoysaq, saqchilar séni solap qoyidu, öyüngge apirip qoysaq, öyüngdikiler yaki sen bu ishni muxbirlargha dep qoyisen, shunga séni bu yerde sayahet qilduruwatimiz" dep jawab berdi.

Hörmetlik radi'o anglighuchilar, tursun ghopur tunji qétimliq ziyaritimizde, xitay herbiy qisimlirining 1993 - yili qeshqerde herbiy meshqtiki mes'uliyetsizliki sewebidin 10 nechche Uyghur balining ölümige we yarilinishigha seweb bolghanliqini pash qilghan. U yene aldinqi yili qeshqer yéngi sheher qamaqxanisining bashqurulush tüzümliri we qamaqxanida yétiwatqanlar heqqide melumat bergen. Tursun ghopur yene ötken yili, nur bekrining erz testiqining qeshqer yéngisheherde kargha kelmigenliki we yéngisheherdiki xitay emeldarlirining nur bekrini mazaq qilghanliqi heqqide melumat bergen.

Tursun ghopur erzge atlan'ghan 19 yildin buyan 20 qétimgha yéqin tutqun qilin'ghan؛ bulardin bir qétimida 2yilliq yene bir qétimida 6 ayliq qamaq jazasigha höküm qilin'ghan. Yuqirqilardin melum bolushiche, tursun ghopurni tutush we solash bilen yolidin yanduralmighan xitay da'iriliri, yéqindin buyan jazalash tedbiridin waz kéchip, uni peqet muxbirlar bilen uchrashturmasliq yolini tallighan. Bu tallash, uning 18 - qurultay mezgilide tashqorghanda yéza sékritarlirining öyide 14 kün tutub turulushigha seweb bolghan.

Toluq bet