Доктор турмуһәммәт һашим тйәнәнмендә йүз бәргән вәқә тоғрисида доклат бәрди

3 Нәпәр уйғур тйәнәнмен мәйданида машина соқуш вәқәси пайда қилғандин кейинки сақчиларниң нәқ мәйданни қоршап турған көрүнүш. 2013-Йили 28-өктәбир, бейҗиң.

11-Айниң 2-күни японийәниң нигата өлкисиниң нагаока шәһиридә өткүзүлгән гамбаро ниппон тәшкилатиниң йиғилишида, 28-өктәбир тйәнәнменгә аптомобил билән һуҗум қилиш вәқәси тоғрисида доклат берилди.

Нагаока шәһиридә өткүзүлгән гамбаро тәшкилатиниң бу қетимқи йиғилишида асаслиқи “хитайниң сенкаку арилиға селиватқан тәһдити вә хитайниң аз санлиқ милләтләрни бастуруш сиясити” дегән темида доклат сөзләш асас қилинди.

Япон милләтчилиридин тәшкилләнгән гамбаро ниппон тәшкилатиниң нигата өлкисидики тармақ шөбисиниң қурулуш мурасимиға алаһидә тәклип билән қатнашқан японийәдики уйғур зиялийси доктор турмуһәммәт һашим “хитайниң уйғурларни бастуруш сияситидин хитайниң маһийитини көрүвалалаймиз” дегән темида доклат бәрди.

Доктор турмуһәммәт һашим доклатида асаслиқи 28-өктәбир хитайниң тйәнәнмен мәйданида йүз бәргән аптомобил билән һуҗум қилиш вәқәси тоғрисида тохталди.

Нагаока шәһиридә өткүзүлгән бу қетимқи паалийәткә японийә юқири палатасиниң әзаси, японийә әркин демократлар партийисиниң муавин секретари ака ике қатнашти вә доклат бәрди.

Ака ике доклатида японийәниң нөвәттики вәзийити, асасий қанунға түзитиш киргүзүш җәрянида парламентта елип бериливатқан муназириләр вә шундақла японийә баш вәзири шинзо абениң ташқи сиясити тоғрисида қисқичә тохталди.

Бу қетимқи паалийәттә гамбаро ниппон тәшкилатиниң секретари, японийә сакура телевизийә истансисиниң мәсули мизушима әпәндиму иштирак қилди вә сенкаку арили мәсилиси һәққидә муһим сөз қилди.

Гамбаро ниппон тәшкилатиниң нигата өлкисидики тармақ шөбисиниң қурулғанлиқини тәбрикләш паалийити нагаока шәһиридики һөкүмәт бинасиниң йиғин залида өткүзүлгән болуп,паалийәт чүштин кейин саәт иккидин бәшкә қәдәр давамлашти, паалийәткә нагаока шәһиридики гамбаро ниппон тәшкилатиниң барлиқ әзалири иштирак қилди.

Биз мәзкур паалийәт һәққидә толуқ мәлуматқа еришиш үчүн, дуня уйғур қурултийи тәтқиқат мәркизиниң муавин рәиси доктор турмуһәммәт һашим билән телефон сөһбити елип бардуқ.

Аваз улинишидин тәпсилатини аңлаң.