Тйәнәнмен һуҗумчиси осман һәсәнниң аилә тавабиатлири һәққидә мәлумат

28-Өктәбир күни тйәнәнмен қовуқиға аптомобил билән һуҗум қилип дуняни зилзилигә кәлтүргән осман һәсән, ақту наһийисиниң үҗмә йезисидин болуп, униң бу һуҗумни елип беришта, хитай һакимийити астида зулум чекиватқан уйғур хәлқиниң дәрд‏-әләм вә ғәзәп нәпритини хитай вә дуня җамаәтчиликигә билдүрүшни мәқсәт қилғанлиқи илгири сүрүлмәктә. Миллий бир ғайә үчүн бир аилидин 3 кишиниң тәңла вақитта һаятини пида қилиши вәзийәт көзәткүчилирини һәйрану-һәс қалдурмақта. Ундақта, осман һәсәнниң ата-ана вә уруқ-туғқанлири кимләр? улар бүгүн қандақ әһвалда?

Мәлум болушичә, осман һәсән икки ача, бир ака, бир ини болуп 5 қериндаш икән. Осман һәсән 7 җанлиқ һәсәнахун аилисиниң әң әтиварлиқ пәрзәнти болуп, осман һәсән һәққидә тарқалған бир хата учур, ата һәсәнахунниң һаятидин айрилишиға сәвәб болған. Баян қилинишичә, 92-йили бир телевизор хәвиридә ичкиридә осман һәсән исимлик бир уйғур яшниң өлгәнлики мәлум қилинған. Әслидә өлгүчи башқа бир осман болуп, өлгүчиниң фамилисиму охшаш болуши, ата һәсәнаханға бәрдашлиқ бәргүсиз йүрәк азаби елип кәлгән. Аилисиниң үмид чириғи һесабланған осман һәсәнниң өлгәнлик хәвири билән йиқилип дохтурханлиқ болған һәсәнахун узун өтмәй һаятидин айрилған.

Тйәнәнмен һуҗумида осман һәсәнниң йенидин орун алған аниси қуванхан һаҗим қолум-қошнилириниң баян қилишичә, кәмсөз вә мулайим бир ана болуп у таки 9-айниң оттурилириға қәдәр ақтуниң үҗмә йезисида пәрзәнт вә нәврилирини тәрбийиләш вә қатарға қетиш билән өткән. Осман һәсәнниң ачилири розихан һәсән,, тиллахан һәсән вә акиси қутлуқ һәсән бу йил 40, 43 вә 45 яшларда болуп, улар, тйәнәнменда вәқә йүз бәргән 28-өктәбир күни кәчтә җорилири вә пәрзәнтлири билән бирликтә тутқун қилинған. Мәлум бир шаһидниң баян қилишичә, осман һәсәнниң қериндашлириниң пәрзәнтлири икки күндин кейин қоюп берилгән, әмма өзлири болса 9 күндин бери ақту наһийидики бир қамақханида тутуп турулмақта. Мәлум болушичә, осман һәсәнниң аниси қуванхан реһим, ақтудин айрилишниң алдида, йәни вәқә йүз бериштин бирәр айчә илгири осман һәсәнниң тәлипигә бинаән бир халта қонақ уни вә акиси қутлуқ һәсәнниң салаһийәт кинишкисини елип маңған. Осман һәсәнниң салаһийәт кинишкиси болмиғанлиқи үчүн, акисиниң салаһийәт кинишкисини сориғанлиқи мәлум.

Осман һәсәнниң иниси абликим һәсән, 90-йилларниң ахири акиси билән бирликтә хитай өлкилиридә иш-оқәт қилған. У 2000-йилларниң бешида мутәллип исимлик бир дости билән хитай өлкилиридин йенип чиқип ақту наһийисидә бир май завути қурушқа тутуш қилған. У бу май завутиниң тәсиси билән мәшғул болуп йүргән күнлириниң биридә уштумтут вә сирлиқ бир қатнаш қазасиға йолуқуп һаятидин айрилған.

Осман һәсәнни тонуғучилар, униң қанун органлириниң инисиниң өлүми һәққидики һөкүмигә ишәнмигәнликини, һәр вақит “ иним қәсткә учриди” дәп қақшап йүргәнликини баян қилиду.

Йәнә мәлум болушичә, осман һәсән илгири ақтуда икки қетим өйләнгән болуп, униң бу икки аялдин 3 пәрзәнти болған. Осман һәсәнниң тйәнәнмен һуҗумида йенида орун алған вә осман һәсән аптомобилни ришаткиға соққан мәзгилдә аптомобилдики бензин бакқа от яққанлиқи илгири сүрүлгән аяли гүлқиз атуштин болуп, осман һәсәнниң гүлқиздин пәрзәнти бар-йоқлуқи һазирчә мәлум әмәс.