Tyen'enmén hujumchisi osman hesenning a'ile tawabi'atliri heqqide melumat

28-Öktebir küni tyen'enmén qowuqigha aptomobil bilen hujum qilip dunyani zilzilige keltürgen osman hesen, aqtu nahiyisining üjme yézisidin bolup, uning bu hujumni élip bérishta, xitay hakimiyiti astida zulum chékiwatqan Uyghur xelqining derd‏-elem we ghezep nepritini xitay we dunya jama'etchilikige bildürüshni meqset qilghanliqi ilgiri sürülmekte. Milliy bir ghaye üchün bir a'ilidin 3 kishining tengla waqitta hayatini pida qilishi weziyet közetküchilirini heyranu-hes qaldurmaqta. Undaqta, osman hesenning ata-ana we uruq-tughqanliri kimler? ular bügün qandaq ehwalda?

Melum bolushiche, osman hesen ikki acha, bir aka, bir ini bolup 5 qérindash iken. Osman hesen 7 janliq hesen'axun a'ilisining eng etiwarliq perzenti bolup, osman hesen heqqide tarqalghan bir xata uchur, ata hesen'axunning hayatidin ayrilishigha seweb bolghan. Bayan qilinishiche, 92-yili bir téléwizor xewiride ichkiride osman hesen isimlik bir Uyghur yashning ölgenliki melum qilin'ghan. Eslide ölgüchi bashqa bir osman bolup, ölgüchining familisimu oxshash bolushi, ata hesen'axan'gha berdashliq bergüsiz yürek azabi élip kelgen. A'ilisining ümid chirighi hésablan'ghan osman hesenning ölgenlik xewiri bilen yiqilip doxturxanliq bolghan hesen'axun uzun ötmey hayatidin ayrilghan.

Tyen'enmén hujumida osman hesenning yénidin orun alghan anisi quwanxan hajim qolum-qoshnilirining bayan qilishiche, kemsöz we mulayim bir ana bolup u taki 9-ayning otturilirigha qeder aqtuning üjme yézisida perzent we newrilirini terbiyilesh we qatargha qétish bilen ötken. Osman hesenning achiliri rozixan hesen,, tillaxan hesen we akisi qutluq hesen bu yil 40, 43 we 45 yashlarda bolup, ular, tyen'enménda weqe yüz bergen 28-öktebir küni kechte joriliri we perzentliri bilen birlikte tutqun qilin'ghan. Melum bir shahidning bayan qilishiche, osman hesenning qérindashlirining perzentliri ikki kündin kéyin qoyup bérilgen, emma özliri bolsa 9 kündin béri aqtu nahiyidiki bir qamaqxanida tutup turulmaqta. Melum bolushiche, osman hesenning anisi quwanxan réhim, aqtudin ayrilishning aldida, yeni weqe yüz bérishtin birer ayche ilgiri osman hesenning telipige bina'en bir xalta qonaq uni we akisi qutluq hesenning salahiyet kinishkisini élip mangghan. Osman hesenning salahiyet kinishkisi bolmighanliqi üchün, akisining salahiyet kinishkisini sorighanliqi melum.

Osman hesenning inisi ablikim hesen, 90-yillarning axiri akisi bilen birlikte xitay ölkiliride ish-oqet qilghan. U 2000-yillarning béshida mutellip isimlik bir dosti bilen xitay ölkiliridin yénip chiqip aqtu nahiyiside bir may zawuti qurushqa tutush qilghan. U bu may zawutining tesisi bilen meshghul bolup yürgen künlirining biride ushtumtut we sirliq bir qatnash qazasigha yoluqup hayatidin ayrilghan.

Osman hesenni tonughuchilar, uning qanun organlirining inisining ölümi heqqidiki hökümige ishenmigenlikini, her waqit “ Inim qestke uchridi” dep qaqshap yürgenlikini bayan qilidu.

Yene melum bolushiche, osman hesen ilgiri aqtuda ikki qétim öylen'gen bolup, uning bu ikki ayaldin 3 perzenti bolghan. Osman hesenning tyen'enmén hujumida yénida orun alghan we osman hesen aptomobilni rishatkigha soqqan mezgilde aptomobildiki bénzin bakqa ot yaqqanliqi ilgiri sürülgen ayali gülqiz atushtin bolup, osman hesenning gülqizdin perzenti bar-yoqluqi hazirche melum emes.