Шаһитлар “5-июл вәқәси” ниң қурбани-адил рози һәққидә еғиз ачти

Мухбиримиз қутлан
2014.03.31
adil-rozi-5-iyul-urumchi-weqesi.jpg “5-июл вәқәси” дин кейин тунҗи түркүмдә өлүм җазасиға һөкүм қилинған шинҗаң балилар педагогика мәктипиниң оқуғучиси адил рози. 2009-Йили 12-өктәбир, үрүмчи.
CCTV

Шаһитлар йеқинда “5-июл вәқәси” ниң қурбанлиридин-шинҗаң балилар педагогика мәктипиниң оқуғучиси адил рози вә униң қисқиғинә һаяти һәққидә еғиз ачти.

Буниңдин 4 йилдин көпрәк вақит илгири, йәни “5-июл вәқәси” йүз берип әмдила 3 ай өткәндә, үрүмчи шәһәрлик оттура сот мәһкимиси тәрипидин өлүм җазасиға һөкүм қилинған тунҗи түркүмдики уйғур мәһбуслар ичидә әмдила 21 яшқа киргән адил рози нурғун кишиләрниң диққитини чәккән. Вәһаләнки, шунчә йиллардин буян һечким, һәтта аилисиму униң қандақларчә тутулуп, шунчә қисқа вақит ичидә өлүмгә һөкүм қилиниши һәққидә сүрүштә қилалмиған.

Ундақта, адил рози ким?

Мәлум болушичә, адил рози шинҗаң балилар педагогика мәктипиниң 2004-йиллиқ оқуғучиси болуп, 2009-йили 3-июл күни оқуш пүттүрүп мәктәптин айрилған. Мәктәп мәмурийити шу йили оқуш пүттүргән оқуғучиларниң нопусини вақтида беҗирип бәрмигәчкә, у бирқанчә савақдиши билән нопусни сақлап үрүмчидә туруп қалған.

Аридин икки күн өткәндә, йәни 5-июл күни үрүмчи даван йолида вақитлиқ туруватқан адил рози из-дерәксиз ғайиб болған. Оқуш пүттүрүп мәктәп дәрвазисидин әмдила айрилған бу сәбий яш аридин 3 ай өткәндә, йәни 10-айниң 12-күни үрүмчи шәһәрлик оттура сот тәрипидин тунҗи түркүмдә өлүм җазасиға һөкүм қилинған.

21 яшлиқ адил розиниң қандақ җинайәт өткүзгәнлики вә 3 айға йәтмигән вақит ичидә сотлинип өлүмгә һөкүм қилиниши униң ата-аниси вә мәктипидики оқутқучилири үчүнму һелиһәм қараңғу.

Адил рози “5-июл вәқәси” ниң қурбани сүпитидә етип ташлинип 4 йилдин артуқ вақит өтүпму униң шаяр наһийисидә олтурушлуқ дадиси рози турап оғлиниң немә җинайәт өткүзгәнликини биләлмигән. У телефон зияритимизни қобул қилған болсиму, лекин бу һәқтә һечнемә дейәлмәйдиғанлиқини вә сөзләшниму халимайдиғанлиқини билдүрди.

Биз бу һәқтә йәниму илгирилигән һалда әһвал игиләш үчүн мәрһум адил розиниң әйни вақиттики мәсул оқутқучисини зиярәт қилдуқ. Һазир муһаҗирәттә яшаватқан, әмма исим-шәрипини ашкарилашни халимайдиған мәзкур оқутқучи адил розиниң делоси һәққидә билидиғанлиридин мәлумат бәрди.

Адил рози шаяр наһийәсидин болуп, 2004-йили шинҗаң балилар педагогика мәктипиниң йәсли маарипи кәспигә қобул қилинған. У мәктәп һаятида әла нәтиҗә билән оқуп, синипида изчил һалда муавин синип башлиқи вәзиписини өтигән шундақла оқутқучи вә савақдашлириниң һөрмитигә сазавәр болуп кәлгән.

2009-Йили 7-айниң 3-күни, йәни “5-июл вәқәси” дин икки күн бурун у мәктәптин айрилип, үрүмчи даван йолидики иҗарә алған өйдә вақитлиқ туруп турған. Мәктәптин нопус рәсмийәтлирини алған һаман юрти шаярға қайтмақчи болған.

Әпсуски, 5-июл кәчқурун у даван йоли әтрапида из-дерәксиз ғайиб болған. Аридин 3 ай өткәндә үрүмчи шәһәрлик оттура сот мәһкимиси тәрипидин тунҗи түркүмдә сотланған 7 нәпәр уйғур яш билән биллә өлүмгә һөкүм қилинип етиветилгән.

Униң билән 2009-йили 7-айниң 3-күни әң ахирқи қетим көрүшкән оқутқучиси униң сирлиқ делоси һәққидә бәзибир түгүнләрни оттуриға ташлиди.

Тәпсилатини аваз улиништин аңлиғайсиз.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.