Үрүмчидики сақчилар "хәлқниң бихәтәрлик юмтали" һәққидә ениқлима бәрди

Өз мухбиримиз меһрибан
2017-04-28
Share
xelq-bixeterlik-app-ep Уйғурлар диярида йеңидин йолға қоюлған "хәлқ бихәтәрлик юмтали" ниң рәсими
Social Media

Радиомиз зияритини қобул қилған үрүмчи сақчилири "хәлқниң бихәтәрлик юмтали" дәп нам берилгән "чеқимчилиқ" юмталиниң рәсмий тарқитилғанлиқини дәлиллиди.

Хитай таратқулири алдинқи күни мәзкур юмталниң "гуманлиқ" әһвалларни сақчи органлириға паш қилишни "қулайлаштуридиған" лиқини хәвәр қилған. Әмма бу һәқтә тохталған көзәткүчиләр, мәзкур юмталниң районда әзәлдин қаттиқ болған учур-алақә әркинликини илгириләп дәхлигә учритидиғанлиқини билдүрди.

Хитай хәлқ тори қатарлиқ таратқулардин мәлум болушичә, үрүмчи шәһәрлик сақчи идариси 25- апрел мәхсус мурасим өткүзүп, "хәлқниң бихәтәрлик юмтали" намидики янфон юмтал һәққидә мәлумат бәргән вә үрүмчи шәһәр аһалисидин бу хил юмтални телефонлириға чүшүрүвелишни тәвсийә қилған. Хәвәрдә йәнә бу юмталдин пайдилинип, гуманлиқ әһваллар һәққидә үрүмчидики сақчи орунлириға учур йәткүзгәнләрниң мукапатлинидиғанлиқи елан қилинған.

Үрүмчи шәһәрлик сақчи идариси тәрипидин тарқитилған мәзкур юмтал һәққидә техиму илгириләп мәлумат елиш үчүн үрүмчи шәһәрлик җ х идариси вә бирқанчә сақчиханиларға телефон қилдуқ.

Үрүмчи шәһәрлик сақчи идариси вә уйғурлар зич олтурақлашқан тәңритағ районидики җәнубий қовуқ, ғалибийәт сақчиханилириниң телефони уланмиди, әмма төмүрйол идариси сақчиханиси вә шималий вогзал сақчиханисиға қилған телефонлиримизни кечилик нөвәтчи сақчилар алди.

Төмүрйол идариси сақчиханисиниң кечилик нөвәтчиликтә туруватқан аял сақчиси өзиниң "хәлқниң бихәтәрлик юмтали" намидики янфон юмтали һәққидики тәпсилатлардин хәвири йоқлуқини, әгәр мәлум қилидиған әһвал болса 110 дело мәлум қилиш телефон номури арқилиқ мәлумат бәрсә болидиғанлиқини билдүрди.

Бу аял сақчидин нөвәттә үрүмчидә йолға қоюлған бихәтәрлик тәдбирлири вә үрүмчи билән җәнубий уйғур дияридики вәзийәт пәрқи һәққидә соал сориғинимизда, у нөвәттә үрүмчидә вәзийәтниң тинч икәнликини, җәнубий уйғур диярида қаттиқ бихәтәрлик тәдбирлири елинғанлиқи үчүн, у җайлардиму вәзийәтниң муқим икәнликини, әмма вәзийәт һәққидики башқа тәпсилий соалларға җаваб берәлмәйдиғанлиқини билдүрди.

Үрүмчи шималий вогзал сақчиханисидин телефонимизни алған сақчи алдинқи күни үрүмчи шәһәрлик сақчи идарисидә мәхсус мухбирларни күтүвелиш йиғини өткүзүлүп, "хәлқниң бихәтәрлик юмтали" намидики янфон юмталиниң мәшғулат иқтидари вә уни ишлитиш һәққидә тәпсилий учурлар берилгәнликини дәллиди.

Униң билдүрүшичә, шәһәр аһалиси хәвәрдә елан қилинған мәшғулат тәртипи һәққидики қәдәм басқучлар бойичә бу хил юмтални қол телефонлириға қачилиғандин кейин, униңдин пайдилинип, "җамаәт бихәтәрлики вә яки муқимлиққа зиянлиқ" дәп қариған гуманлиқ әһвалларни дәрһал қисқа учур, рәсим яки видийоларни йоллаш усули бойичә сақчи органлириға мәлум қилса болидикән.

Хитайниң хәлқ торидики хәвәрдә, бу хил юмтал арқилиқ, сақчи даирилирини хәвәрләндүргүчиләргә учурниң қиммитигә асасән ишқа ярайдиған учур әвәткәнләрни мукапатлайдиғанлиқи тилға елинған.

Әмма бу сақчи мәшғулат һәққидики тәпсилатларни һөкүмәт хәвәрлиридин көрүшни тәкитлиди. Йәнә мукапат соммиси вә бу хил юмтал немә үчүн базарға селинғанлиқи һәққидики башқа соалларға җаваб берәлмәйдиғанлиқини билдүрүп, телефонни қоювәтти.

Хитай һөкүмитиниң уйғур елидә "бихәтәрликни қоғдаш" намида, уйғурларға қаритилған бесимни һәссиләп күчәйтиши хәлқарадики кишилик һоқуқ органлириниң күчлүк тәнқидигә учримақта.

Дуня уйғур қурултийи баянатчи дилшат ришит әпәндиниң қаришичә, хитай даирилири нөвәттә уйғурларға қаритилған назарәт, чәклимә вә бастурушни барғанчә күчәйтиватқан болуп, кишиләрниң шәхси учурлириниму қамал қилишни мәқсәт қилған бу хилдики бу янфон юмтали уйғурларда өзиниң хәтәрликигә болған әндишиси техиму күчәйтип, өз әтрапидики кишиләр һәтта хизмәтдашлири достлириға болған гуманхорлуқ туйғусини ашуруветидикән.

Интернетниң уйғур диярида омумлишишиға әгишип, хитай даирилири уйғур диярида интернет учуриға қарита қаттиқ қамал йүргүзүп кәлмәктә.

"интернеттә диний әсәбийликкә аит учурларни тарқатти" дегән баһаниләр билән тутқун қилиниватқан уйғурлар йеқинқи икки йилдин буян техиму көпәйгән болуп, даириләр бу йил 4- айниң бешида уйғур елидә йәнә 10 кишини торда тарқатқан материяллири сәвәблик җазалиған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт