Ürümchidiki saqchilar "Xelqning bixeterlik yumtali" heqqide éniqlima berdi

Öz muxbirimiz méhriban
2017-04-28
Share
xelq-bixeterlik-app-ep Uyghurlar diyarida yéngidin yolgha qoyulghan "Xelq bixeterlik yumtali" ning resimi
Social Media

Radi'omiz ziyaritini qobul qilghan ürümchi saqchiliri "Xelqning bixeterlik yumtali" dep nam bérilgen "Chéqimchiliq" yumtalining resmiy tarqitilghanliqini delillidi.

Xitay taratquliri aldinqi küni mezkur yumtalning "Gumanliq" ehwallarni saqchi organlirigha pash qilishni "Qulaylashturidighan" liqini xewer qilghan. Emma bu heqte toxtalghan közetküchiler, mezkur yumtalning rayonda ezeldin qattiq bolghan uchur-alaqe erkinlikini ilgirilep dexlige uchritidighanliqini bildürdi.

Xitay xelq tori qatarliq taratqulardin melum bolushiche, ürümchi sheherlik saqchi idarisi 25- aprél mexsus murasim ötküzüp, "Xelqning bixeterlik yumtali" namidiki yanfon yumtal heqqide melumat bergen we ürümchi sheher ahalisidin bu xil yumtalni téléfonlirigha chüshürüwélishni tewsiye qilghan. Xewerde yene bu yumtaldin paydilinip, gumanliq ehwallar heqqide ürümchidiki saqchi orunlirigha uchur yetküzgenlerning mukapatlinidighanliqi élan qilin'ghan.

Ürümchi sheherlik saqchi idarisi teripidin tarqitilghan mezkur yumtal heqqide téximu ilgirilep melumat élish üchün ürümchi sheherlik j x idarisi we birqanche saqchixanilargha téléfon qilduq.

Ürümchi sheherlik saqchi idarisi we Uyghurlar zich olturaqlashqan tengritagh rayonidiki jenubiy qowuq, ghalibiyet saqchixanilirining téléfoni ulanmidi, emma tömüryol idarisi saqchixanisi we shimaliy wogzal saqchixanisigha qilghan téléfonlirimizni kéchilik nöwetchi saqchilar aldi.

Tömüryol idarisi saqchixanisining kéchilik nöwetchilikte turuwatqan ayal saqchisi özining "Xelqning bixeterlik yumtali" namidiki yanfon yumtali heqqidiki tepsilatlardin xewiri yoqluqini, eger melum qilidighan ehwal bolsa 110 délo melum qilish téléfon nomuri arqiliq melumat berse bolidighanliqini bildürdi.

Bu ayal saqchidin nöwette ürümchide yolgha qoyulghan bixeterlik tedbirliri we ürümchi bilen jenubiy Uyghur diyaridiki weziyet perqi heqqide so'al sorighinimizda, u nöwette ürümchide weziyetning tinch ikenlikini, jenubiy Uyghur diyarida qattiq bixeterlik tedbirliri élin'ghanliqi üchün, u jaylardimu weziyetning muqim ikenlikini, emma weziyet heqqidiki bashqa tepsiliy so'allargha jawab bérelmeydighanliqini bildürdi.

Ürümchi shimaliy wogzal saqchixanisidin téléfonimizni alghan saqchi aldinqi küni ürümchi sheherlik saqchi idariside mexsus muxbirlarni kütüwélish yighini ötküzülüp, "Xelqning bixeterlik yumtali" namidiki yanfon yumtalining meshghulat iqtidari we uni ishlitish heqqide tepsiliy uchurlar bérilgenlikini dellidi.

Uning bildürüshiche, sheher ahalisi xewerde élan qilin'ghan meshghulat tertipi heqqidiki qedem basquchlar boyiche bu xil yumtalni qol téléfonlirigha qachilighandin kéyin, uningdin paydilinip, "Jama'et bixeterliki we yaki muqimliqqa ziyanliq" dep qarighan gumanliq ehwallarni derhal qisqa uchur, resim yaki widiyolarni yollash usuli boyiche saqchi organlirigha melum qilsa bolidiken.

Xitayning xelq toridiki xewerde, bu xil yumtal arqiliq, saqchi da'irilirini xewerlendürgüchilerge uchurning qimmitige asasen ishqa yaraydighan uchur ewetkenlerni mukapatlaydighanliqi tilgha élin'ghan.

Emma bu saqchi meshghulat heqqidiki tepsilatlarni hökümet xewerliridin körüshni tekitlidi. Yene mukapat sommisi we bu xil yumtal néme üchün bazargha sélin'ghanliqi heqqidiki bashqa so'allargha jawab bérelmeydighanliqini bildürüp, téléfonni qoyuwetti.

Xitay hökümitining Uyghur élide "Bixeterlikni qoghdash" namida, Uyghurlargha qaritilghan bésimni hessilep kücheytishi xelq'aradiki kishilik hoquq organlirining küchlük tenqidige uchrimaqta.

Dunya Uyghur qurultiyi bayanatchi dilshat rishit ependining qarishiche, xitay da'iriliri nöwette Uyghurlargha qaritilghan nazaret, cheklime we basturushni barghanche kücheytiwatqan bolup, kishilerning shexsi uchurlirinimu qamal qilishni meqset qilghan bu xildiki bu yanfon yumtali Uyghurlarda özining xeterlikige bolghan endishisi téximu kücheytip, öz etrapidiki kishiler hetta xizmetdashliri dostlirigha bolghan gumanxorluq tuyghusini ashuruwétidiken.

Intérnétning Uyghur diyarida omumlishishigha egiship, xitay da'iriliri Uyghur diyarida intérnét uchurigha qarita qattiq qamal yürgüzüp kelmekte.

"Intérnétte diniy esebiylikke a'it uchurlarni tarqatti" dégen bahaniler bilen tutqun qiliniwatqan Uyghurlar yéqinqi ikki yildin buyan téximu köpeygen bolup, da'iriler bu yil 4- ayning béshida Uyghur élide yene 10 kishini torda tarqatqan matériyalliri seweblik jazalighan idi.

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet