Muhajirettiki Uyghur ayalliri qozghalmaqta

Ixtiyariy muxbirimiz ekrem
2018-01-24
Share
bir-awaz-bir-qedem.jpg "Bir awaz, bir qedem" guruppisining logosi.
RFA/Ekrem

Xitayning Uyghur diyaridiki éghir basturushliridin ghezeplen'gen chet'ellerdiki Uyghurlar türlük shekillerde qarshiliq körsetmekte.

Xitayning Uyghur diyarida yürgüzüwatqan chékidin ashqan basturush siyasetliri muhajirettiki Uyghurlarning birlik, ittipaqliqigha türtke bolush bilen birge, ularni türlük shekillerde qarshiliq körsitishke mejburlawatqanliqi ayan bolmaqta.

Yéqinda dunyaning herqaysi jayliridiki Uyghur ayalliri öz-ara alaqilerde bolup, ijtima'iy taratqularda "Bir awaz, bir qedem" topini qurup, 3-ayning 15-küni b d t we herqaysi döletlerdiki hökümet binaliri aldida birla künde ayallarni asas qilghan halda "Ün-tünsiz étiraz bildürüsh" namayish teshkillimekchi bolghan. Dunya Uyghur qurultiyi buninggha ehmiyet bilen qarap, 22-yanwar élan qilghan "Yawropa parlaménti aldida 5 ming kishilik namayish chaqiriqi" da, pütün dunyadiki Uyghur teshkilatlirini Uyghur ayallirining bu pidakarliq rohini qizghin qollash we medet bérishke chaqirghan.

Muhajirettiki Uyghur ayalliri arisida "Bir awaz, bir qedem" herikitini qozghash teshebbusini otturigha qoyghan we mezkur heriketning yétekchiliridin biri bolghan amérikidiki Uyghur ziyaliysi süreyye xanim bu heqte toxtalghanda, bu heriketning xitay zulumigha sewr-taqiti qalmighan Uyghur ayallirining ortaq iradisi ikenlikini tilgha aldi.

"Bir awaz, bir qedem" herikitining yétekchiliridin biri bolghan amérikidiki Uyghur ziyaliysi roshen abbas xanim bundaq bir heriketni qozghashqa türtke bolghan amil we bu guruppining qurulush meqsiti heqqide toxtilip, Uyghur ayalliriningmu öz mejburiyetlirini ada qilish we öz jasaretlirini namayan qilishning waqti kelgenlikini tilgha aldi.

Gérmaniyediki Uyghur ziyaliysi peride xanimmu bu heqte toxtilip, Uyghurlarni xitay zulumining birleshtürüwatqanliqini, Uyghur ayalliriningmu sewri-taqetlirining chékige yetkenlikini ipade qildi. U sözide "Bir awaz, bir qedem" herikitining gheplet ichidiki Uyghurlarni oyghitishni meqset qilidighanliqini we bu heriketning istiqbaligha ümid bilen qaraydighanliqini bildürdi.

"Bir awaz, bir qedem" topidiki inkaslardin, ayallarning bu heriketke tolimu hayajan bilen awaz qoshuwatqanliqi melum bolmaqta.

Melum bolushiche, bu heriket sépige 10 din artuq dölettin yüzlerche xanim-qizlar qoshulghan bolup, bu qoshun barghanséri zoriyip barmaqta iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet