Бейҗиңға 61 қетим барған 71 яшлиқ әма әрздар ели ришит пичанда бир йилдин бери қамақта

Хотән қарақашлиқ әрздар ғоҗимәмәт җаппарниң кийимигә йезивалған әрзнамиси. 2015-Йили январ(орни ениқ әмәс)

Бу йил 71 яшқа киргән, пичан йеңийәрлик ели ришит, 20 йилниң алдида кичик бир иҗтимаий җидәлгә четилип қелип тутқун қилинған, сорақ вә қийнаш давамида униң бир көзигә ток калтәк тегип, шу көзи кардин чиққан.

Сорақ ахирида ели ришит гунаһсиз дәп қарилип қоюп берилгән, әмма униңға һечқандақ төләм берилмигән. Шуниң билән ели ришитниң 20 йилға созулған әрз сәпири башланған. Бу җәрянда у әрз қилип, бейҗиң уни арқисиға яндуруп, пичан даирилири уни тутуп әкелип һармиған. У бейҗиңға 61 қетим барғандин кейин, әң ахирқи нәтиҗә сүпитидә бултур 2-айда тутқун қилинған. У тутулуп бир йилдин буян униң нәдилики, саламәтлик әһвали вә қануний салаһийити һәққидә аилиси һечқандақ учур алалмиған. Нөвәттә униң икки оғли тутқун дадисиниң һалидин хәвәр тепиш үчүн сақчи вә башқа һөкүмәт органлири арисида тепирлап йүрмәктә.

Бир йилдин бери из-дерикини елиш мумкин болмайватқан тутқун 71 яш, униң үстигә әма, йәни иккинчи дәриҗилик мейип. Тутулуш сәвәби болса әрз қилиш.

Әма әрздар ели ришит бейҗиңға 61 қетим сәпәр қилған, бу мушәққәтлик сәпәр вә ечинишлиқ ақивәтниң башланғуч һекайиси қарашәһәрдин башланған:
Әма әрздар ели ришитниң 61 қетимлиқ бейҗиң сәпиридин кейин, пичан даирилири униңға бир йүрүш бина өй вә 200 миң сом пул беридиғанлиқини ейтқан, әмма даириләр 200 миң сомни айда 2 миң сомдин бөлүп беридиғанлиқини уқтурған, ели ришит өзиниң яшинип қалғанлиқини нәзәрдә тутуп, төләмниң мундақ парчилинип берилишини рәт қилған. Нәтиҗидә пичан сақчилири униң йәнә әрз қилип бейҗиңға беришидин әндишә қилип уни қамаққа ташлиған.

Бу вәқәдә кишини ойға салидиғини, әрздар ели ришитниң сәврчанлиқи, чарчимаслиқи, янмаслиқи. Бу, ели ришитниң бейҗиңға үмидниң чоңлуқидинму яки йәрлик әмәлдарлар билән қаршилишиш ирадисиниң күчлүклүкидинму вә яки тартилған зиянниң чоңлуқи вә толуқлимиса болмайдиғанлиқидинму? бу соалларға ели ришитниң өзидин җаваб елишқа амалсизмиз, униң оғлиниң җаваби мундақ: “атмиш нәччә қетимлиқ сәпәрдә аз дегәндә 500-600 миң сом чиқим тарттуқ, шуңа дадамдин талай қетим бу әрздин ваз кечишни өтүнүп сорудум, дадамниң дәйдиғини шу ‛бу әрздин ваз кәчсәм өлүвалсам болиду‚”