Әрздар: «зораванлиқ йолиға мәҗбурландим, лекин маңмидим»

Мухбиримиз шөһрәт һошур
2015-02-10
Елхәт
Пикир
Share
Принт
Әрздар өмәр рози дадиси билән. (Вақти вә орни ениқ әмәс)
Әрздар өмәр рози дадиси билән. (Вақти вә орни ениқ әмәс)
RFA/Shöhret Hoshur

Йопурға байаватлиқ әрздар өмәр рози, өзиниң 3 йилдин буян даириләр тәрипидин зораванлиқ йолиға васитилик һалда мәҗбурланғанлиқини, лекин у йолға маңмиғанлиқини илгири сүрди. Униң қаришичә, у бейҗиңдики мәзгилидә даириләр униң өйигә бесип кирип кесәлчан дадисиға тил салған вә дадисиниң қан бесими өрләп өлүшигә сәвәб болған. Йәнә униң баян қилишичә, у юртидики мәзгилдә йезиниң бир сақчи хадими уни тиғ көтүрүп сақчиханиға келишкә вә сақчиханиниң дәрвазисини чеқишқа дәвәт қилған вә шундила униң әрзиниң толуқ вә тез һәл болидиғанлиқини есиға салған. У өзигә мәсхирә тәләппузида дейилгән юқириқи сөз вә дадисиниң зиянкәшликкә учришини, өзини чоңрақ бир иш чиқиришқа қутритиш дәп қарайдиғанлиқини билдүрди. Өмәр розиниң қаришичә, төвәндики даириләр мәсилини чоңайтип уни қануний җәһәттин тез вә кәскин бир тәрәп қилишқа урунған.

Әрздар өмәр рози алдинқи йили бейҗиңдики мәзгилидә, йәрлик даириләр уни давадин ваз кәчтүрүш үчүн униң кесәлчан дадисиға бесим ишләткән. Әҗәблинәрлики, униң дадисиниң компартийә әзалиқ салаһийити, униңға имтияз ата қилған әмәс, әксичә униң гунаһкарлиқ дәриҗисиниң ешишиға сәвәб болған.

Дәвагәр өмәр рози тартивелинған салаһийәт кинишкисини қайтурувелиш үчүн, сақчиханиға барғинида, күтүлмигән бир җавабқа еришкән, нөвәтчи хадим, униңға салаһийәт кинишкисини берәлмәйдиғанлиқини ейтиш билән бирликтә, әгәр тиғ көтүрүп келип, сақчихана дәрвазисини чақса, һәммә ишниң тәңла һәл болидиғанлиқини ейтқан.

Йеқинқи йиллардин бери, хитай тәрәп уйғур елида улғийиватқан миллий қаршилиқ һәрикәтлирини зораванлиқ вә террорлуқ һәрикити дәп әйиблимәктә, әмма мустәқил көзәткүчиләр зораванлиқ йолиниң уйғурларниң өзлири талливалған әмәс, бәлки мәҗбурланған йол икәнликини тәкитлимәктә. Йәни көзәткүчиләрниң қаришичә, хитайниң сияситидики адаләтсизлик вә йәрлик әмәлдарларниң бу сиясәтләрни иҗра қилиш давамидики зораванлиқлири, уйғур миллий қаршилиқ һәрикәтләрниң зорлуқ шәклидә давам қилишиға түрткә болған. Йопурға байаватлиқ әрздар өмәр розиниң юқириқи кәчмиши, көзәткүчиләрниң мәзкур пикриниң асассиз әмәсликини испатлимақта.

Пикирләр (0)
Share
Толуқ бәт