Хитай әрздарлар тосалғусиз кирип кетиватқан дөләтлик әрзийәт идарисигә икки уйғур әрздар киргүзүлмигән

Мухбиримиз шөһрәт һошур
2015-03-02
Елхәт
Пикир
Share
Принт
Хитай коммунист хәлқ қурултийи йепилиш мәзгилидә, әрздарлар сот мәһкимиси алдида. 2011-Йили 19-өктәбир, бейҗиң.
Хитай коммунист хәлқ қурултийи йепилиш мәзгилидә, әрздарлар сот мәһкимиси алдида. 2011-Йили 19-өктәбир, бейҗиң.
www.boxun.com

Бүгүн, йәни 3-айниң 2-күни хитай дөләтлик әрзийәт идариси чағанлиқ дәм елишини түгитип, әрздарларни қобул қилиш үчүн ишикини ачқан; ишик алдиға топланған бәш йүздин артуқ хитай әрздар һечқандақ тосалғусиз кирип кетиватқан ишиктин икки уйғур әрздар киришкә тәмшәлгинидә, улар тосувелинип ичигә киргүзүлмигән. Улар дәрвазида вәзипә өтәватқан аманлиқ хадимлири тәрипидин тосувелинипла қалмастин, җайида 20 минутчә тохтитип қоюлған.
Аманлиқ хадимлириниң телефонлиридин өзлирини шинҗаң иш беҗириш орниға яки сақчиларға тапшуруп бериш үчүн һәрикәт қиливатқанлиқини байқиған икки уйғур әрздар, ахири дөләтлик әрзийәт идариси алдидин қечип қутулған.

Мәлум болушичә, хитай дөләтлик әрзийәт идариси һәр бир әрздарниң әрзийәт идарисигә киришигә пәқәт 3 айда бир қетим йол қойиду. Әң ахирқи қетим бултур 12-айда әрзийәт идарисигә киргән икки уйғур әрздар, бүгүн қайта кириш пурсити йетип келип дөләтлик әрзийәт идарисиниң алдиға барған. 500 Дин артуқ хитай әрздар тосалғусиз һалда кирип кетиватқан бу ишиктин икки уйғур әрздар киргүзүлмигән.

Бултурниң түнүгүнки күнидә йәни 1-март күни кунмиң пойиз истансида пичақлиқ һуҗум йүз бәргән, вәқәдә 5 нәпәр уйғур пидаий хитай тәрәптин 31 кишини өлтүргән вә 141 кишини яриландурған. Түнүгүн йәнә чиңхәй өлкисидә ели мәттурсун исимлик бир гумандар сақчиларниң қолидин икки қорални елип қечип 15 саәттин кейин тутулған. Шуңа хитай даирилири бу вәқәләр сәвәбидин, уйғурларға қарита бихәтәрлик тәдбирлирини пәвқуладдә күчәйткән болуши, вә мушу сәвәбтин икки уйғур әрздарниң әрзийәт идарисигә киргүзүлмигәнлики еһтималға йеқин көрүлмәктә. Буниңдин башқа, һәр йили бейҗиңда ечилидиған икки йиғин мәзгили, уйғур әрздарларға қарита контроллуқ техиму күчийидиған бир вақит, шуңа, мушу һәптә ичидә йәни 5-март күни бейҗиңда ечилидиған икки йиғин, бүгүн икки уйғур әрздарниң бешиға кәлгән аваричиликниң сәвәби болуши мумкин.

Вәқә вә униң сәвәби һәққидики мәлуматларни юқиридики аваз улинишидин аңлиғайсиләр.

Пикирләр (0)
Share
Толуқ бәт