Уйғур районида әрздарларниң шәһәр атлиши омумйүзлүк һалда чәкләнди

Мухбиримиз шөһрәт һошур
2015-04-16
Елхәт
Пикир
Share
Принт
Хотән қарақашлиқ әрздар ғоҗимәмәт җаппар. 2015-Йили январ(орни ениқ әмәс)
Хотән қарақашлиқ әрздар ғоҗимәмәт җаппар. 2015-Йили январ(орни ениқ әмәс)
RFA/Shohret

Хитай даирилири йиллардин бери уйғур әрздарларни әрз қилип барған үрүмчи вә бейҗиң қатарлиқ җайлардин қайтуруп әкелиш тәдбирини қоллинип кәлгән, бәзи нуқтилиқ әрздарларни өз тәвәликидин чиқармаслиқ мәқситидә нәзәрбәнд қилған болсиму, буларниң бәзилири йәнә нәзәрбәнд мәзгили яки униңдин кейин юрт атлап әрзини давамлаштурған иди.

Мәлум болушичә, бултурниң йеримидин башлап, хитай даирилири патигүл ғулам, нурунгүл тохти қатарлиқ ғоллуқ әрздарларни қамаққа елиш билән бирликтә, башқа барлиқ әрздарларни өз шәһиридин сиртқа чиқармаслиқ тәдбирини қолланған. Буниң үчүн һәрқайси аптобус бекәт вә пойиз истансилириға әрздарлар қара тизимликини берип, уларниң шәһәр атлишиға йол қоймиған. Нәтиҗидә районда әқәллий инсаний һәқләрдин бири болған қатнаш әркинликиму дәпсәндә қилинған.

Бейҗиңда яшаватқан икки нәпәр әрздарниң ашкарилишичә, йеқинда маралбешидин бейҗиңға қарап йолға чиққан бир әрздар қәшқәр аптобус бекитидә, үрүмчидин йолға чиққан бири үрүмчи пойиз вогзалида тосуп қелинған. Маралбешилиқ әрздарни тосувалған бекәт хадимлири әрздарниң салаһийәт кинишкисини тартивелип, униң кәнт секретарини чақиртип әкәлгән вә кинишкини секретарға тутқазған, секретар кинишка билән бирликтә әрздарни маралбешиға қайтуруп әкәткән.

Йеқинда йәнә турпандин йолға чиққан бир әрздар ниңша тәвәликигә кәлгәндә бейҗиңдики икки уйғур әрздарға телефон қилип өзиниң келиватқанлиқидин хәвәр бәргән вә бейҗиңда учришишқа келишкән, әмма шуниңдин кейин униңдин һечқандақ учур болмиған. Мәлум болушичә, даириләр уйғур елидики әрздарларни омумйүзлүк һалда өзи туруватқан йеза яки наһийә тәвәликидин чиқармаслиқ тәдбирини қолланмақта.

Хәлқара кишилик һоқуқ хитабнамисиниң 13 ‏-маддисида кишиләр өз дөләт чеграси ичидә йөткилиш вә маканлишиш һоқуқиға игә дейилгән; бу маддида йәнә кишиләрниң өзи тәвә дөләттин айрилип чиқип кетиш вә қайтип келиш һоқуқи барлиқиму ениқ бәлгиләнгән. юқириқи пакитлар хитай тәрәпниң уйғурларниң әқәллий һәқлиридин бири йөткилиш йәни қатнаш һәққиниму дәпсәндә қиливатқанлиқини испатлимақта.

Пикирләр (0)
Share
Толуқ бәт