80 Yashtin ashqan erzdar abdurehim qari amalsiz süküt qilishqa mejbur bolghan

Muxbirimiz qutlan
2014.10.21
erzdar-boway-305.jpg Bir oghli melum bir xitay teripidin pichaqlinip öltürülgen bir boway, qatil qolgha ilinip uzun mezgil ötmeyla qoyup bérilgendin kéyin 9 yildin artuq erz qilghan. 2009-Yili 23 aprél.
RFA

Igilishimizche, nechche milyon som qimmitidiki öy-jay we béghidin mejburiy ayrilghan 80 yashtin ashqan abdurehim qari bu yil maydin étibaren erz qilishtin toxtashqa mejbur bolghan.

Uning atush sheher ichi ot öchürüsh idarisining udulidiki awat kochigha jaylashqan 3 mo 4 pung yéri birqanche yillar ilgiri qoru-jayi we béghi bilen qoshup mejburiy tartiwélin'ghan.

Eyni waqitta atush sheher süntagh yéziliq hökümet bilen sheher qurulush idarisi birliship abduréhim qarining qoru jaylirini erzan bahada xitay qurulush shirkitige sétip bérishke qistighan.

Abdurehim qari yerlik da'irilerning bu yolsiz telipini ret qilghandin kéyin, uning qoru-jayi mejburiy türtüp tüzliwétilgen. Qorudiki yette éghiz öyi bilen birqanche éghiz dukanliri we béghi pütünley weyran qilin'ghan.

Melum bolushiche, abdurehim qari yerlik da'irilerning yolsizliqigha qarshiliq körsetkende, u ikki qétim saqchilar teripidin qattiq urulghan. Shundaq bolushigha qarimay 80 yashtin ashqan bu boway yillarche erz qilishtin toxtimighan.

Wehalenki, xitay da'irilirining bu yil 22-maydin bashlap Uyghur élida yolgha qoyghan “Nöl nuqta herikiti”, yeni “Qattiq zerbe bérish we tazilash” opératsiyesi dawamida abdurehim qari bashliq Uyghur erzdarlar waqtinche süküt qilishqa mejbur bolghan.

80 Yashtin ashqan abdurehim qari qanunluq yer-jayi we mal-mülki üchün jénini tikip qoyghan bolsimu, lékin da'irilerning bu yildin buyanqi yuqiri bésimliq siyasiti tüpeyli dawamliq erz qilishtin toxtighan. Bu dewadin ümid üzgen uning baliliri terep-tereptin dadisigha nesihet qilip jan'gha taqashqan bu dewadin qol üzüshke, shundaqla hökümetning déginige könüshke qistighan.

Bügün abdurehim qarining qizi gülmire bilen oghli exmetjan radi'omiz ziyaritini qobul qilip, dadisining bu dewadin waqtinche toxtashtiki bezi seweblirini bayan qildi.

Gülmirening bildürüshiche, yerlik da'iriler aran 450 ming som pul we 50 kwadrat métir kélidighan töwen ijarilik öydin 2 yürüsh bérip boldi qilghan. Tartiwélin'ghan eslidiki jayning bazardiki sétilish qimmiti 5 milyon somgha toxtaydiken.

Éghir bésim tüpeyli amalsiz qalghan bu a'ile bu yil 5-ayda hökümetning dégen yérige kélishke mejbur bolghan.

Abdurehim qari shexsen özi buni qobul qilmighan, axirqi jénini bu dewagha tikip qoyghan bolsimu, lékin uning oghli exmetjan köz aldidiki weziyetni közde tutup öz aldigha imza qoyghan we bu ishni boldi qilghan.

Tepsilatini awaz ulinishtin anglighaysiz.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.