Uyghur ayal: hijabni yaqturmaymen, lékin hökümetning cheklishini erkinlikke xilap dep qaraymen

Xitay hökümiti yéqinqi bir yillardin béri Uyghur élide roza, ramizan, hijab, saqal we bashqa diniy simwol, diniy ibadetlerni men'i qilip, xilapliq qilghan Uyghurlarni qattiq basturup keldi.

Xitay da'irilirining neziride saqal, hijab we bashqa diniy simwollar, belgilen'gen meschit we ibadet orunliridin bashqa yerlerde tebligh sözlesh, namaz oqush, diniy pa'aliyet qilish “Qanunsiz “Diniy heriket”, “Diniy ashqunluq” hésablandi.

Xitay bu siyasiti rayonda dindar Uyghurlarning izchil qattiq naraziliqini qozghap, bezide bu naraziliq ular bilen xitay amanliq küchliri otturisidiki qanliq toqunushlarni keltürüp chiqardi.

Kishilik hoquq teshkilatliri we gherb démokratik döletlirining qarishiche, xitayning siyasiy Uyghurlarning asasi kishilik hoquq, diniy erkinlikige muxalip.

Dindarliq, dindarlarning hayati, diniy simwollar we xitayning diniy siyasitige diniy ehkamlargha toluq emel qilmaydighan Uyghurlar qandaq qaraydu? biz bügün bu mesile heqqide ürümchide olturushluq bir Uyghur ayal bilen söhbet élip barduq.

Güzelnur xanim özini musulman hésablaydighan, biraq kündilik hayatida islam we musulmandarchiliqning perz, sünnetlirige anche emel qilip ketmeydighan Uyghur ayallirining biri. U, xitayning diniy simwollarni cheklesh siyasitige baha bérip, “Hijabni yaqturmaymen, lékin hökümetning cheklishini erkinlikke xilap, dep qarimaymen” dédi. Biz uning bilen söhbitimizni namaz oqamsiz? dégen so'al bilen bashliduq.