B d t da Uyghurlarning eyiblishige xitay hey'iti jawab berdi

B d t kishilik hoquq kéngishining 25-nöwetlik insan heqliri omumiy yighinidin körünüsh. 2014-Yili mart, jenwe.

B d t kishilik hoquq kéngishining 25-nöwetlik insan heqliri omumiy yighinidin körünüsh. 2014-Yili mart, jenwe.

B d t kishilik hoquq kéngishining 25-nöwetlik insan heqliri omumiy yighinida d u q re'isi rabiye qadir xanim namidin ömer qanat söz qildi. Ömer qanat ependi 18-mart küni chüshtin kéyin b d t ning jenwediki zalida ötküzgen omumiy yighinda qilghan sözide Uyghurlar duchar boluwatqan insan heqliri depsendichilikini anglatti. U nutqida xitayning Uyghurlarning ana tilini ishlitish hoquqini qolidin tartiwalghanliqi, ilham toxti, abduwéli ayup qatarliq ziyaliylarni Uyghurlarning qanuniy heqlirini qoghdighanliqi üchünla türmige tashlighanliqi, xitay hökümitining Uyghurlargha bésim siyasiti yürgüzüwatqanliqini otturigha qoydi.

Kéyin xitay hey'iti söz qilip d u q hey'itige reddiye bildürüp mundaq dédi:
-Xitay qanun döliti, xitayda héchkim özini qanundin yuqiri orun'gha qoyalmaydu. Ilham toxti xitayning qanunigha xilap ish qilghan bolghachqa qanun boyiche jazalandi. Bu xitayning qanuniy hoquqi. Héch kim buninggha arilishalmaydu. Xitay az sanliq milletlerning heq we hoquqini qoghdashqa alahide ehmiyet béridu. Az sanliq milletlerge qarita yaxshi siyasetlerni tüzüp chiqip, az sanliq millet rayonining iqtisadini tereqqiy qildurushqa alahide ehmiyet bériwatidu. Xitay döliti az sanliq milletlerning pikir erkinliki, diniy étiqad erkinliki, örp-adetlirini qoghdashqa oxshash pütün heq-hoquqlirini kapaletke ige qildi. Uyghurlarmu shundaq. Emma xitay döletning bixeterlikini qoghdash üchün térrorizm heriketlirige qarshi küresh qilmaqta. Biz qanunsiz teshkilatlarning bu yighin'gha qatnishishigha qarshi turimiz we naraziliqimizni ipadileymiz.

D u q re'isi rabiye qadir xanim, mu'awin re'is ömer qanat, ijra'iye komitéti mudiri dolqun eysa ependilerdin terkib tapqan d u q hey'itining bügünki pa'aliyitimu nahayiti ghelibilik ötken bolup, biz bu heqte téximu tepsiliy melumat élish üchün rabiye qadir xanim bilen téléfon söhbiti élip barduq.

Tepsilatini yuqiridiki awaz ulinishidin anglighaysiler.