Түрк тәтқиқатчи: шәрқий түркистанлиқлар аллаһ ата қилған барлиқ һоқуқлиридин мәһрумдур

Ихтиярий мухбиримиз әркин тарим
2014-05-16
Share
sahibqiran-istrategiyilik-tetqiqat-merkizi-uyghur-mesilisi.JPG Әнқәрәдә ечилған "шәрқий түркистан вә түркмән елидики инсан һоқуқлири дәпсәндичилики" мавзулуқ йиғиндин көрүнүш. 2014-Йили 15-май, түркийә.
RFA/Erkin Tarim

15-Май әнқәрәдә ечилған бир кишилик һоқуқ йиғинда шәрқий түркистанлиқларниң аллаһ уларға ата қилған барлиқ һоқуқлиридин мәһрум һалда зулум чекиватқанлиқи оттуриға қоюлди.

Бу сөзләр түркийә саһибқиран истратегийилик тәтқиқат мәркизи қанун, инсан һоқуқлири вә чәтәлдики түркләр башқармиси чақирған "шәрқий түркистан вә түркмән елидики инсан һоқуқлири дәпсәндичилики" мавзулуқ йиғинда тәкитләнди.

Йиғинға әнқәрәниң мәркизигә җайлашқан түркийә мухбирлар уюшмисиниң залида өткүзүлди. Йиғинда саһибқиран истратегийилик тәтқиқат мәркизиниң мәсуллири, мутәхәссислири, түркийә мухбирлар уюшмисиниң мәсуллири, әнқәрәдә паалийәт елип бериватқан аммиви тәшкилатларниң мәсуллири вә университет оқуғучилиридин болуп 150 әтрапида киши қатнашти.

Саһибқиран истратегийилик тәтқиқат мәркизиниң мәсули җәсурхан таш әпәнди мәркәзниң бундин кейин дунядики болупму шәрқий түркистандики инсан һәқ вә һоқуқлири тоғрисида доклат тәйярлап түркийә һөкүмитигә сунидиғанлиқини баян қилип мундақ деди: биз саһибқиран истратегийилик тәтқиқат мәркизи болуш сүпитимиз билән инсанни, инсанниң бәхтлик болушини асас қилған биз көр қарашқа игә.

"инсанларниң мәвҗудийитини қоғдисаң дөләтниң мәвҗутлуқиму давамлишиду" дегән сөзни өзимизгә шоар қилдуқ. Дунясиниң қайси йеридә инсан һәқ вә һоқуқлири дәпсәндичилики болса биз униңға қарши туримиз. Бу мунасивәт билән биз көп қетимлиқ инсан һәқ вә һоқуқлири доклат бериш йиғини өткүзүшни қарар қилдуқ. Бу хил доклат бериш йиғинлири нәтиҗисидә шәрқий түркистандики инсан һәқ вә һоқуқлири тоғрисида доклат тәйярлап һөкүмитимизгә сунимиз.

У сөзиниң ахирида көп қисимлиқ инсан һәқ вә һоқуқлири тоғрисида өткүзүлидиған йиғинда алди билән түрк дунясидики инсан һәқ вә һоқуқлири дәпсәндичилики, арқидин мусулман дөләтлиридики инсан һәқ вә һоқуқлири дәпсәндичилики, кейин башқа дөләтләрдики инсан һәқ вә һоқуқлири дәпсәндичилики тоғрисида музакирә елип баридиғанлиқини ейтти.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт