Уйғур деһқанни уруп мейип қилған хитай секретар лү руңниң мәнсипи йәнә өсти

Мухбиримиз шөһрәт һошур
2015.09.02
memtimin-mettoxti-305.jpg Хотән шәнбә базар парткоминиң сабиқ секретари, нөвәттики наһийилик диний ишлар идарисиниң башлиқи ли роң тәрипидин уруп мейип қилинған мәмтимин мәттохтиниң дохтурханидики рәсими, 2008-йили 6-ай.
RFA

Биз өткән йили хотәнниң керийә наһийә шәнбәбазар йезисида йүз бәргән хитай секретар лү руңниң уйғур деһқан мәмтимин мәттохтини уруп мейип қилип қойғанлиқи вә униң шу вәқәдин кейин өстүрүлүп керийә наһийилик бирликсәп идарисиниң башлиқлиқиға өстүрүлгәнлики һәққидә хәвәр бәргән идуқ. Мухбиримиз бүгүн вәқәдә зиянкәшликкә учриған аилигә қайта телефон қилип секретар лү руң вә зиянкәшликкә учриғучи мәмтимин мәттохтиниң әһвали һәққидә мәлумат игилиди. Шаһитлар лү руңниң бу йил йәнә өстүрүлүп, хотән вилайәтлик бирлик сәп идарисиниң башлиқлиқиға тәйинләнгәнликини, 2 йил қамақта йетип чиққан мәмтимин мәттохтиниң болса пиландин сирт туғулған пәрзәнти үчүн җәриманә төләватқанлиқини ашкарилиди.

Биз уйғур деһқанни уруп мейип қилғандин кейин шәнбәбазар йезилиқ парткомдин йөткиветилгән вә наһийилик бирликсәп идарисигә башлиқ қилип тәйинләнгән сабиқ секретар лү руңниң нөвәттики әһвалини билип беқиш үчүн зиянкәшликкә учриған аилигә телефон қилдуқ. Бу аилидикиләр лү руңниң йәнә бир балдақ өстүрүлүп хотән вилайәтлик бирликсәп идарисигә йөткәлгәнликини ашкарилиди.

Биз бу ишниң рас-ялғанлиқини ениқлаш үчүн хотән вилайәтлик бирликсәп идарисигә телефон қилдуқ вә бу идаридә лү руң исимлик бириниң бар-йоқлуқини соридуқ. Хадим соалимизға җаваб беришни рәт қилди. Биз арқидин вилайәтлик парткомдики йәнә бир хадимдин мәлумат соридуқ, авазини ашкарилашни халимиған бу хадим, мәмтимин мәттохти аилиси тохтавсиз әрз қилғандин кейин, даириләрниң наразилиқини пәсәйтиш үчүн лү руңни шәнбәбазар йезилиқ һөкүмәттин керийә наһийисигә йөткивәткәнликини, әмма лү руңниму үмидсизләндүрмәслик вә илһамландуруш үчүн наһийилик бирликсәп идарисигә башлиқ қилип тәйинлигәнликини ашкарилиди. Әмма у, лү руңниң керийә наһийәсидин вилайәткә өстүрүлүшиниң сәвәбидин хәвәрсиз икәнликини ейтти.

Бу, уйғур деһқанлириға зораванлиқ қилған вә уларни бозәк қилған хитай әмәлдарлириниң тунҗи қетим өстүрүлүши әмәс, шуңа бу һәқтә пикир баян қилған уйғур көзәтчиләр юқири дәриҗилик хитай әмәлдарлириниң уйғур районида аталмиш муқимлиқтин башқа ғайиси йоқлуқини, зораванлиқ тәбиити вә тәҗрибиси болған хитай, вәзипидарларни һечқачан җазалимайдиғанлиқини, әксичә шәклини өзгәрткән һалда мукапатлайдиғанлиқини оттуриға қойди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.