Uyghur déhqanni urup méyip qilghan xitay sékrétar lü rungning mensipi yene östi

Biz ötken yili xotenning kériye nahiye shenbebazar yézisida yüz bergen xitay sékrétar lü rungning Uyghur déhqan memtimin mettoxtini urup méyip qilip qoyghanliqi we uning shu weqedin kéyin östürülüp kériye nahiyilik birliksep idarisining bashliqliqigha östürülgenliki heqqide xewer bergen iduq. Muxbirimiz bügün weqede ziyankeshlikke uchrighan a'ilige qayta téléfon qilip sékrétar lü rung we ziyankeshlikke uchrighuchi memtimin mettoxtining ehwali heqqide melumat igilidi. Shahitlar lü rungning bu yil yene östürülüp, xoten wilayetlik birlik sep idarisining bashliqliqigha teyinlen'genlikini, 2 yil qamaqta yétip chiqqan memtimin mettoxtining bolsa pilandin sirt tughulghan perzenti üchün jerimane tölewatqanliqini ashkarilidi.

Biz Uyghur déhqanni urup méyip qilghandin kéyin shenbebazar yéziliq partkomdin yötkiwétilgen we nahiyilik birliksep idarisige bashliq qilip teyinlen'gen sabiq sékrétar lü rungning nöwettiki ehwalini bilip béqish üchün ziyankeshlikke uchrighan a'ilige téléfon qilduq. Bu a'ilidikiler lü rungning yene bir baldaq östürülüp xoten wilayetlik birliksep idarisige yötkelgenlikini ashkarilidi.

Biz bu ishning ras-yalghanliqini éniqlash üchün xoten wilayetlik birliksep idarisige téléfon qilduq we bu idaride lü rung isimlik birining bar-yoqluqini soriduq. Xadim so'alimizgha jawab bérishni ret qildi. Biz arqidin wilayetlik partkomdiki yene bir xadimdin melumat soriduq, awazini ashkarilashni xalimighan bu xadim, memtimin mettoxti a'ilisi toxtawsiz erz qilghandin kéyin, da'irilerning naraziliqini peseytish üchün lü rungni shenbebazar yéziliq hökümettin kériye nahiyisige yötkiwetkenlikini, emma lü rungnimu ümidsizlendürmeslik we ilhamlandurush üchün nahiyilik birliksep idarisige bashliq qilip teyinligenlikini ashkarilidi. Emma u, lü rungning kériye nahiyesidin wilayetke östürülüshining sewebidin xewersiz ikenlikini éytti.

Bu, Uyghur déhqanlirigha zorawanliq qilghan we ularni bozek qilghan xitay emeldarlirining tunji qétim östürülüshi emes, shunga bu heqte pikir bayan qilghan Uyghur közetchiler yuqiri derijilik xitay emeldarlirining Uyghur rayonida atalmish muqimliqtin bashqa ghayisi yoqluqini, zorawanliq tebi'iti we tejribisi bolghan xitay, wezipidarlarni héchqachan jazalimaydighanliqini, eksiche sheklini özgertken halda mukapatlaydighanliqini otturigha qoydi.