Sekrattiki anining tutqun qilin'ghan oghli bilen téléfonda bolsimu körüshüwélish telipi ret qilin'ghan

“Ötken yili 3-ayning 29-küni puqrache kiyin'gen 6 saqchi oghlum tursunjanni korlidiki öyimizdin élip ketken idi. Oghlum shu élip kétilginiche ghayib boldi. Hazirgha qeder oghlum bilen bir qétim bolsimu körishelmiduq…”

Mana bu bir yildin buyan tutup kétilgen oghlining iz-dérikini alalmay qiynilip yürgen bir atining zari.

Radiyomiz 2016-yilining bashlirida “Misranim” torining bashqurghuchisi we mol-hosulluq tor yazari tursunjan memet marshalning tutqun qilin'ghanliqi heqqidiki uchurni uning a'ile tawabi'atliri bilen yerlik da'irilerning bayanliridin delilligen idi.

Halbuki, aridin bir yilgha yéqin waqit ötken bolsimu, da'iriler dangliq tor yazghuchisi ömerjan hesen bozqir we uning délosi bilen chétishliq bolghan tor bashqurghuchi tursunjan memet marshalning ehwali heqqide héchqandaq xewer bermidi.

Biz bu heqte tursunjan memet marshalning a'ile-tawabi'atliridin ehwal sürüshtürduq. Uning dadisi özining bir yildin buyan tutqundiki oghlini sürüshtürüp barmighan jayi qalmighanliqini, nurghun jeryanlardin kéyin andin oghlining aqsudiki merkiziy tutup turush ornigha qamalghanliqidin xewer tapqanliqini bildürdi.

Melum bolushiche, tursunjan tutqun qilin'ghandin kéyin yürek, qan bésimi we shéker késili biraqla qozghalghan ana yiqilip chüshüp, doxturxanida yétip qalghan. Tursunjanning dadisining éytishiche, nöwette ayalining késili barghanséri éghirliship, sekrat halitige chüshüp qalghan. Sekrattiki ana oghli bilen héch bolmisa téléfonda bolsimu körüshüwélishni telep qilghan bolsimu, emma aqsu da'iriliri bu iltimasni keskin ret qilghan.

Biz tursunjan memet marshal bilen ömerjan hesen bozqirning aqsu wilayetlik merkiziy tutup turush ornigha qamalghanliqi heqqidiki uchurgha asasen bu yerge téléfon qilduq. Epsuski, nöwetchi saqchi bu heqte sözlishishni ret qilip téléfonni qoyuwetti.

Biz arqidin aqsu sheherlik qizil köwrük saqchixanisigha téléfon qilip, yuqiriqi ikki neper tutqunning ehwali heqqide uchur bérishni soriduq. Halbuki, saqchixanining mes'ul xadimi bu heqte héchnéme déyelmeydighanliqini, buni sheherlik saqchi idarisidin sorishimizni éytip sözlishishni qopalliq bilen ret qildi.

Nöwette türkiyede yashawatqan Uyghur serxilliridin abduweli ayup bu heqte radiyomiz ziyaritini qobul qildi. U, 2014-yilidin ötken yilighiche dawamlashqan da'irilerning “Tor tazilash” herikiti dawamida ablimit ghojabdulla qaraqash, ömerjan hesen bozqir we tursunjan memet marshal qatarliq tor yazarliri bilen “Baghdash”, “Misranim” we bashqa Uyghurche tor bet sahiblirining tutqun qilin'ghanliqini sanap ötti. Abduweli ayup yene bu “Tazilash” ning Uyghur torchiliqi we Uyghurlarning tor dunyasi arqiliq qanat yéyiwatqan pikir telqinlirige éghir yoqitish élip kelgenlikini tekitlidi.