Shinjang téléwiziye istansisidin muxter bughra qatarliq 6 kishining tutqunda ikenliki aydinglashti

Muxbirimiz shöhret hoshur
2018-11-30
Share
Muxter-Bughra.png Ataqliq sha'ir, shinjang téléwiziye istansisining döletlik birinchi derijilik rézhissori muxter bughra.
Social Media

Ijtima'iy taratqularda tarqalghan tutqundiki Uyghur ziyaliyliri tizimlikide shinjang téléwiziye istansisining döletlik birinchi derijilik rézhissori muxter bughra, rézhissor mexmutjan sidiq we téxnik exmetjan metrozining isimlirimu orun alghan idi. Yéqinda yene bezi anglighuchilirimiz radiyomizgha uchur yollap, shinjang téléwiziye istansisining xadimliridin ablet zeydin, yash riyasetchi zulpiqar we yene bir qisim awaz artistliriningmu tutqun qilin'ghanliqini melum qildi. Muxbirimizning bügünki éniqlashliri dawamida Uyghur diyardiki alaqidar xadimlar muxter bughraning tutqunda ikenlikini delillesh bilen birlikte yuqirida ismi tilgha élin'ghanlarningmu tutqunda ikenlikini chetke qaqmidi.

Muhajirettiki Uyghur ziyaliyliridin abduweli ayup bilen tahir hamut teripidin teyyarlan'ghan "Tutqundiki Uyghur ziyaliylar" namliq tizimlikte ataqliq rézhissor, sha'ir we sinarist muxter bughraningmu tutqunda ikenliki bildürülgen.

Bu heqte téléfonimizni qobul qilghan shinjang xelq radi'o istansisi qazaq bölümining xadimi gerche özining muxter bughra bilen bir idaride ishleydighanliqini tilgha alghan bolsimu, emma uning ehwali heqqide melumat bérelmidi.

"Tutqundiki ziyaliylar tizimliki" de shinjang téléwiziye istansisining rézhissori mexmutjan sidiq we téxnik exmetjan metroziningmu tutqunda ikenliki yézilghan. Radiyomizgha kelgen yene bir inkasta mezkur istansining xadimliridin ablet zeydin we riyasetchi zulpiqar küreshningmu tutulghanliqi bayan qilin'ghan. Shinjang téléwiziye istansisining nöwetchi xadimliri özliri bilen bir binada xizmet qilidighan yuqiriqi xadimlarning ehwalidin melumat bérelmidi. Shinjang téléwiziye istansining qoghdash bölümi mudiri muxter bughra heqqidiki so'allirimizdin jiddiyleshti. U yuqiriqi shexslerning nede tutup turuluwatqanliqi, qachan tutulghanliqi we néme üchün tutulghanliqi heqqide xewiri yoqluqini éytqan bolsimu, emma ularning tutqun qilin'ghanliqini inkar qilmidi. U bu heqte néme üchün éniqlash élip bériwatqanliqimizni qayta-qayta sorash arqiliq muxter bughra qatarliqlarning tutulghanliqi heqqidiki uchurning toghriliqini delillidi. U yene bu heqte so'al soralsa bolmaydighanliqini eskertip, muxter bughra qatarliqlar chétishliq déloning jiddiylikini ashkarilidi.
Alaqidar xadimlar biz ismini tilgha alghan shexslerdin héchbirining nöwette ish ornida barliqini tilgha alalmidi. Shinjang téléwiziye istansisining siyasiy bölümimu muxter bughraning tutulghanliq uchurini inkar qilmidi. U xadim bu heqte melumat bérish salahiyitige ige kishining peqetla téléwiziye istansisi teshwiqat bölümining mes'ul xadimi ikenlikini körsetti. Bu xadim shinjang téléwiziye istansisidin muxter bughra bilen birlikte jem'iy qanche kishining tutqun qilin'ghanliqini sorighinimizda, u öz xizmetdashliridin tutqun qilin'ghan bir qanche kishining barliqini tilgha aldi. Bu xadim yene rézhissor muxter bughraning délosini ürümchi sheherlik "Gobaw" (dölet amanliq idarisi) bir terep qilghanliqini ashkarilidi. Ürümchi sheherlik dölet amanliq idarisining melum bir xadimi muxter bughraning délosini özi ishligenlikini inkar qilmasliq bilen birlikte yene mezkur déloning matériyallirini alaqidar bölümlerge yollap bolghanliqini ashkarilidi. Emma u déloda némiler déyilgenliki, uning qandaq xulasilinidighanliqi heqqide melumat bermidi. 

Hörmetlik radi'o anglighuchilar, tor arxiplirida körsitilishiche, rézhissor muxter bughra yéqinqi 20 nechche yil mabeynide köpligen shé'ir we naxsha tékistlirini yézish bilen birlikte Uyghur rayonida yéqinqi yillarda ötküzülgen köpligen edebiyat-sen'et pa'aliyetlirige, jümlidin noruz, meshrep we yéngi yil kéchiliki filimlirigha rézhissorluq qilghan iken. U yene "Uyghur 12 muqami" heqqidiki yürüshlük sin filimining "Iraq muqami" qismighimu rézhissorluq qilghan iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet