Yéngisardiki bir saqchi: "Tutulghanlarning köpinchisi 10 yilliqtinla késiliwatidu"

Muxbirimiz shöhret hoshur
2017-09-11
Share
mekit-kolliktip-sot.jpg 22-May ürümchi etigenlik bazar hujumidin kéyin, Uyghurlargha térrorchi qalpiqini kiydürüp, mekit nahiyiside échilghan kolléktip sot meydanidin körünüsh. 2014-Yili 10-iyun.
Oqurmen teminligen

Yéngisar saghunda bala baqquchi hörnisa dostigha yaghliq artishni tewsiye qilghanliqi üchün 10 yilliq késilgen.

Féysbokta tarqalghan we Uyghur élidin ewetilgenliki ilgiri sürülüwatqan yéngisarning nöwettiki siyasiy weziyiti heqqidiki uchurda tutqunlarning san jehettin pewqul'adde köplükidin bashqa yene yoqilang sewebler bilen 10 we 15 yilliqtin késiliwatqanliqi bayan qilin'ghan idi. Muxbirimizning bu yip uchigha asasen ehwal éniqlishi dawamida bir saqchi xadimi 13 ming nopusluq topuluq yézisida 2mingdin artuq kishining qamaqta ikenlikini ashkarilash bilen birlikte tutulghanlarning köpinchisining 10 yilliqtinla késiliwatqanliqini bayan qildi. 

Yéngisarda dawam qiliwatqan keng kölemlik tutqun we chiqiriliwatqan éghir jaza hökümliri heqqide yéngisardiki saqchixanilardin yenimu ilgiriligen halda melumat soriduq. Saqchi xadimliridin biri, bu yil tutulghanlarning köpinchisining 10 yilliqtinla késiliwatqanliqini delillidi.

Anglighuchilirimizdin biri radi'omizgha inkas yollap, yéngisar saghanning 1‏-kentide hesen imin isimlik 70 yashliq bir kishining 11 yashliq perzentige din terbiyisi bergenliki üchün tutulghanliqi we yéqinda qamaqta ölgenlikini melum qilghan idi. Bu ehwalni éniqlishimiz dawamida saghanning 7‏-kentide yashta chong bir kishining qamaqta ölgenliki ashkarilandi, emma kimliki delillenmidi. 

Mezkur saqchi yéngisar saghanda 21 yashliq hörnisa nasirning bir dostigha yaghliq artishni tewsiye qilghanliqi üchün 10 yilliq késilgenliki ashkarilidi. Yene mezkur saqchi bilen sékrétarlarning bayan qilishiche, yéngisar mangshin yézisining baghche kentide sabiq mehbus abduwasip ömer bu yil 1-ayda bir kent kadirni "Ghalcha" dep tillap qoyghanliqi üchün tekrar 10 yilliq késiwétilgen.

Aldinqi küni bir saqchi xadimi 13 ming nopusluq topluq yézisidin 2 mingdin artuq kishi tutulghanliqi, topluqning nopusi 3000 etrapidiki öteng kentidin 415 kishining tutulghanliqini, bezi a'ililerdin 2 din 5 ke qeder kishining tutulghanliqini pash qilghan idi.

Éniqlishimiz dawamida abduwasip ömerning singlisi xeyrinisa ömerningmu terbiyilesh merkizide ikenliki ashkarilandi. Biz saqchilar teminligen téléfon uchurlirigha asasen, bir qisim mehbus we tutqun a'ile-tawabatlirighimu téléfon qilduq. Hörnisa nasirning dadisi qizining tutulush sewebige heyran qalghanliqini bildürdi. 

Matériyallarda körsitilishiche, yéngisar nahiyisi ikki bazar, 12 yézidin teshkillen'gen, omumiy nopusi 284 ming kélidighan bir nahiye. Hazirgha qeder, keng‏-kölemlik tutqun we késim dawam qiliwatqan yéngisar nahiyisining we 13 ming nopusluq topluq yézisidin 2 mingdin artuq kishining qamaqta ikenliki delillendi؛ bu yil qanliq weqege chétilghan yéngisarning sétil qatarliq bashqa yéza-bazarlirida hazirgha qeder qanche kishi tutulghan we késilgenliki melum emes.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.