Amérika dölet mejlisining binasi aldida Uyghur yashlirining namayishi bashlandi

Muxbirimiz irade
2018-06-04
Élxet
Pikir
Share
Print
Amérika dölet mejlisining binasi aldida ötküzülgen Uyghur yashlirining uzun muddetlik namayishida d u q aliy rehbiri rabiye qadir xanim söz qilmaqta. 2018-Yili 4-iyun.
Amérika dölet mejlisining binasi aldida ötküzülgen Uyghur yashlirining uzun muddetlik namayishida d u q aliy rehbiri rabiye qadir xanim söz qilmaqta. 2018-Yili 4-iyun.
Photo: RFA

Bügün amérika paytexti washin'gton we etrapidiki rayonlarda yashaydighan Uyghur jama'iti amérika dölet mejlisi aldida uzun muddet dawamlashturushni pilanlighan namayishini bashlidi. Namayish 4-iyul düshenbe etigen sa'et 10 da bashlighan bolup, namayishqa dunya Uyghur qurultiyining aliy rehbiri rabiye qadir xanim ishtirak qildi. U radiyomiz ziyaritini qobul qilip, bu namayishni wirjiniye shtatidiki Uyghur yashlirining özlükidin teshkilligenlikini, shunga özining ularning bu herikitini qollash we ulargha medet bérish üchün kelgenlikini bildürdi.

Namayishni qollap-quwwetligen orunlar ichide amérika tom lentus kishilik hoquq fondimu bar bolup, tom lentos fondining re'isi katrina lentos xanim namayishchilar arisidin orun aldi. Katrina xanim radiyomizgha qilghan sözide Uyghur élida 800 mingdin 1 milyon'gha yéqin gunahsiz, tinchliqperwer kishiler lagérda yétiwatqan bir shara'itta özlirining amérika dölet mejlisi we hökümitini bu mesilige alahide diqqet qilishqa chaqirip bu yerge chiqqanliqini bildürdi. Katrina xanim sözide yene amérika dölet ishliri ministirliqi we shundaqla amérika dölet mejlisi kéngesh palata ezasi marko rubiyolar qilghan chaqiriqlarni qarshi élish birge, uni yéterlik dep qarimaydighanliqini eskertti.

Katrina xanm mundaq dédi: "Elwette dölet mejlisining bezi ezaliri bu mesilige ipadisini bildürüwatidu. Emma bu yéterlik emes, yenimu köp kishiler bu mesilige köngül bölüshi kérek. Menche, amérika hökümitining kishilik hoquqni depsende qilghuchi hakimiyetlerni, emeldarlarni jazalaydighan, ulargha cheklime qoyup, bankidiki mal-mülüklirini tonglitalaydighan bir yaxshi qorali bar, u bolsimu "Xelq'ara magnétiski qanuni". Shunga biz amérika hökümitining Uyghur mesilisige nahayiti köp diqqette bolushini arzu qiliwatimiz. Biz bu arqiliq dölet mejlisini Uyghurlargha qarita bundaq zalimlarche siyaset yürgüzüwatqan xitay emeldarlirigha qarshi choqum bir tedbir alghuzidighan bésim shekillendürüshimiz kérek."

Bügünki namayishqa yene xelq'arada kishilik hoquqni we dini erkinlikni teshebbus qilidighan bir qisim amérikiliq yash kishilik hoquq pa'aliyetchilirimu qatnashqan bolup, ular radiyomizgha qilghan sözide özlirining Uyghur mesilisini qollaydighanliqini, bu yerge sherqiy türkistan xelqi üchün dini erkinlik telep qilish we uni qollaydighanliqini namayan qilish üchün kelgenlikini éytti.

Axirida namayishqa qatnashqan Uyghur yashlardin biri ziyaritimizni qobul qilip, bu namayishni asasen yashlarning Uyghur diyaridiki qérindashlirigha bir awaz bolush, ularning derdini anglitish üchün uyushturghanliqini we bundaq pa'aliyetlerni dawamlashturidighanliqini bildürdi.

Bügünki namayish köpligen Uyghurlarning qatnishishi bilen nahayiti qizghin keypiyat ichide dawam qildi. Namayishchi yashlar amérika dölet mejlisi aldidiki namayishini yene üzüldürmey dawamlashturidighanliqini bildürdi.

Toluq bet