Xelq'ara kechürüm teshkilati türmidiki ablikim abdurehim üchün pa'aliyet élip bardi

Xtay türmisidiki ablikim abdurehim

Melum bolushiche, bash shtabi londondiki xelq'ara kechürüm teshkilatining orunlashturushi bilen bu yilliq xitayning bahar bayrimida xongkong, tokyo qatarliq sheherlerdiki mezkur teshkilatning shöbiliri xitay türmiside yétiwatqan ablikim abdurehim qatarliqlargha béghishlap “Qayta jem bolush” timisida pa'aliyet élip barghan.

Xelq'ara kechürüm teshkilatining orunlashturushi bilen élip bérilghan “Qayta jem bolush” pa'aliyiti xitay türmiside yétiwatqan siyasiy mehbuslardin nobél tinchliq mukapati sahibi lyu shawboning ayali lyu shya, kishilik hoquq pa'aliyetchisi rabiye qadir xanimning oghli ablikim abdurehimdin ibaret bu ikki kishige béghishlan'ghan.

“Qayta jem bolush” pa'aliyitide dunyaning her qaysi jayliridiki kechürüm teshkilatining orunlashturushi bilen köpligen tinchliqperwer insanlar xitay hökümitige xitay en'enisige asasen bahar bayrimiliq qizil baghaqcha tebriknamisi yollap, ablikim abdurehim qatarliq siyasiy mehbuslarning türmidin balduraq qoyup bérilip a'ilisidikiler bilen birge jem bolushidin ibaret özlirining insaniy arzu - tileklirini ipadiligen.

Xelq'ara kechürüm teshkilatining bu pa'aliyet heqqidiki doklatida, ürümchidiki tötinchi türmide yétiwatqan toqquz yilliq qamaq jazasigha höküm qilin'ghan ablikim abdurehimning hazir salametlik ehwalining nacharliqi, uning a'ilisidikiler bilen ötken yili 4 - ayda 20 minut körüshkendin buyan ta hazirgha qeder qayta körüshüsh pursiti bermigenliki körsitilgen shundaqla ablikim abdurehim “Uyghur kishilik hoquq pa'aliyetchisi rabiye qadir xanimning oghli” dep alahide eskertilgen.

Doklatta xitaydiki kishilik hoquq pa'aliyetchisi lyu shyaning a'ilisige nezerbend qilinip, barliq erkinlikidin mehrum qilin'ghanliqinimu otturigha qoyulghan.

Xelqara kechürüm teshkilatining bu qétimqi pa'aliyitide lyu shya,ablikim abdurehim qatarliqlarning balduraq erkinlike chiqishi üchün, insanperwer kishilerning xitayning jama'et xewpsizlik ministiri go shéngkün'ge, Uyghur aptonom rayonluq jama'et xewpsizlik nazaritining naziri ju changjége biwaste xet yollishi tewsiye qilin'ghan.

Xelq'ara kechürüm teshkilatining bu heqtiki pa'aliyti heqqide toxtalghan tokyo shöbisining mes'uli kobayashi ziyaritimizni qobul qilip bu heqte toxtilip mundaq dédi: “Xelq'ara kechürüm teshkilatining xongkong shöbisining biwaste yétekchilikide bahar bayrimi munasiwiti bilen rabiye qadir xanimning oghlining balduraq türmidin qoyup bérilishi üchün bu pa'aliyetni élip barduq. Bahar bayrimi xitay xelqi üchün tolimu muhim bolghan eneniwiy bayramlardin biri, shunga biz pursetni ching tutup bu pa'aliyetni orunlashturduq. Elwette, arzuyimiz ablikim abdurehimni bir kün bolsimu türmidin balduraq azad qilip a'ilisidikiler bilen birge jem qilishtin ibaret.

Biz xelq'ara kechürüm teshkilatining bu pa'aliyiti munasiwiti bilen xitay türmiside yétiwatqan ablikim abdurehimning anisi, dunya Uyghur qurultiyining re'isi rabiye qadir xanim bilen bu heqte söhbet élip barduq.

Yuqiriqi awaz ulinishidin tepsilatini anglang.