Хитай чәтәлдики уйғурларниң аилә тавабиатлирини гөрүгә алмақта

Ихтиярий мухбиримиз оғузхан
2017-10-30
Елхәт
Пикир
Share
Принт
Мәлум сода мәркизи әтрапида пос туруватқан хитай қораллиқ күчлири. 2015-Йили 16-апрел, хотән.
Мәлум сода мәркизи әтрапида пос туруватқан хитай қораллиқ күчлири. 2015-Йили 16-апрел, хотән.
AFP

Бир қисим шаһитлар радийомизға әһвал мәлум қилип, хитай даирилириниң юртида қалған ата-анилири яки аилә тавабиатлирини тутқун қилип, уларни қайтип келишкә қиставатқанлиқини ашкара қилмақта.

Һазир голландийәдә яшаватқан җүрәт әпәнди хитай һөкүмитиниң бесими вә өзигә келиватқан тәһликә түпәйлидин өткән йилиниң ахири юртидин қечишқа мәҗбур болған уйғурларниң бири.

У радийомиз зияритини қобул қилғинида атуштики 2 нәпәр нәврә инисиниң йәкән қирғинчилиқи йүз бәргән елишқу йезисидин өйләнгәнлики сәвәблик тутқун қилинип кесиветилгәнликини ашкарилиди.

У юртидин айрилип түркийәгә чиқип кәткәндин кейин, атуштики сақчи даирилири бу йилниң башлирида униң ата-анисини гөрү һесабида тутқун қилған. Дадисиниң диабит кесили тутқун җәрянида еғирлишип, йиқилип чүшкәчкә ахири сақчи даирилири униң кесәлмән ата-анисини қоюп бәргән. Әмма уларниң орниға җүрәтниң укисини бу йил 4-айда тутқун қилған һәмдә униң аилисигә «қачан оғлуңлар чәтәлдин қайтип кәлсә укисини қоюп беримиз,» дегән.

Җүрәт әпәнди йәнә атушниң мәлум йезисидики 70 яшқа йеқинлишип қалған һәсән исимлик пенсийәгә чиққан бир пешқәдәм оқутқучиниң йеқинда 7 йиллиқ қамаққа кесиветилгәнликини ашкарилиди.

Униң билдүрүшичә, бу пешқәдәм оқутқучи алдинқи йилларда атуштики бай тиҗарәтчиләрни һәрикәтләндүрүп ианә топлиған вә йетим-йесир, тул аялларға ярдәм қилған икән. Йәрлик даириләр уни «барин вәқәсидә кесиветилгән бир ‹бөлгүнчи' ниң аилисигә бир тонна көмүр, миң йүән пул вә икки халта ун ярдәм қилипсән,» дегән баһанә билән тутқун қилған икән.

Алдинқи йили америкаға келип сиясий панаһлиқ тәләп қилған арман әпәндиму радийомиз зияритини қобул қилип, үрүмчи, қарамай, санҗи, майтағ вә шималдики башқа шәһәрләрдә қассапчилиқ, навайлиқ, баққалчилиқ вә ашхана мулазимити билән шуғуллиниватқан миңлиған уйғур һүнәрвән-касибларниң юртлириға мәҗбурий қайтурулғанлиқини, уларниң көп қисминиң нөвәттә өз юртлиридики «йепиқ тәрбийәләш мәркәзлири» дә тутуп турулуватқанлиқини ашкарилиди.

Тәпсилатини аваз улиништин аңлиғайсиз.

Пикирләр (0)
Share
Толуқ бәт