Washin'gton shehride “5000 Kishilik namayish”ni qollash namayishi ötküzüldi

Muxbirimiz eziz
2018.04.27
Share on WhatsApp
Share on WhatsApp
namayish-xitay-elchixanisi-0427 27-Aprél küni washin'gton shehridiki xitay elchixanisi aldida ötküzülgen namyishtin bir körünüsh, 2018-yili 27-aprél
Photo: RFA

Dunyaning herqaysi jayliridiki Uyghur jama'itining ömlük we birlikte ish körüsh rohi yéqinda ötküzülgen “Bir awaz bir qedem” namayishida tégishlik yosunda eks etken idi. 27- Aprél küni bélgiyening paytexti béryussél shehridiki yawropa parlaménti aldida ötküzülgen “5000 Kishilik zor namayish”ta bu hal yene bir qétim gewdilendi.

Yawropa parlaménti aldidiki zor namayishni qollash yüzisidin amérikidiki Uyghurlarning puqrawiy teshkilati bolghan amérika Uyghur birleshmisining biwaste teshkillishi bilen amérikining paytexti washin'gton shehrige yéqin jaylardiki Uyghur jama'iti 27-aprél küni chüshtin kéyin xitay bash elchixanisi aldigha toplandi. Amérikidiki aktip Uyghur pa'aliyetchilerdin zubeyre shemsidin namayish aldida ziyaritimizni qobul qilip, wetendiki éship bériwatqan zulumning téximu köp Uyghurlarni qarshiliq yoligha ündewatqanliqini éytti.

Namayishchilar  qolliridiki ay-yultuzluq kök bayraqlarni égiz kötürüp, sep bolup tizilghanda bügünki pa'aliyetni teshkilligüchilerdin biri, amérika Uyghur birleshmisining re'isi élshat hesen bügünki pa'aliyetning aldi bilen “Sherqiy türkistan marshi” bilen bashlinidighanliqini jakarlidi hemde köpchilikni birlikte hörmet bildürüshke chaqirdi.

“Sherqiy türkistan marshi”din kéyin élshat hesen söz élip bügünki namayishqa qatnashqili kelgen Uyghurlargha alahide rehmet bildürüsh bilen birge, hazirqidek pütkül Uyghur jemiyiti tarixta körülmigen kirizisqa duch kelgen bir mezgilde bundaq namayishlarning téximu zor qimmiti bolidighanliqini sözlep ötti.

Shuningdin kéyin namayishchilar xitay elchixanisi aldida “Uyghurlargha erkinlik!”, “Sherqiy türkistan'gha erkinlik!” dégendek ünlük sho'arlarni towlidi.  Yérim sa'etche dawam qilghan sho'ar towlashtin kéyin namayishchilar sep bolup tizilip xitay elchixanisidin dunya miqyasida amérikining simwolluq obrazi bolghan aq saraygha qarap yürüsh qildi. Namayishchilar yol boyi Uyghurlar nöwette duch kéliwatqan éghir siyasiy, iqtisad we medeniyet mesililirini sho'ar sheklide towlap mangdi hemde shu arqiliq kochilardiki kishilerningmu tégishlik diqqitini qozghidi.

Namayish jeryanida bash bolup sho'ar towlap méngiwatqan élshat hesen namayishchilar sépide kétiwétip ziyaritimizni qobul qildi hemde qisqiche qilip bügünki namayishning yawropadiki “5000 Kishilik namayish”ni qollash yüzisidin teshkillen'genlikini alahide tekitlidi.

Bügünki namayishqa qatnashqanlar ötken qétimlardiki namayishlargha qarighanda körünerlik köp bolup, sep bolup méngiwatqan birnechche yüz kishi arisida namayishqa aktip qatnishiwatqanlarmu, yéngidin bu sepke qétiliwatqanlarmu, shuningdek yash-qoramining xéli bir yerge bérip qalghanliqigha qarimay alayiten kelgenlermu bar idi. Shu qatarda namayishchilar arisidiki ayqizdin néme üchün bu xil namayishlargha aktip qatnishiwatqanliqini sorighinimizda mushundaq pa'aliyetler arqiliq özining xitay hökümitige bolghan ghezep-nepritini ipadiliwatqanliqini bildürdi.

Namayishchilar jarangliq sho'ar sadaliri ichide aq saraygha yürüsh qilip, özlirining Uyghurlar hemde Uyghurlar jemiyiti heqqidiki sho'arlirini mushu jayda axirlashturdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.