Xitay izdewatqan abduweli hajining xeyr-saxawetchi ikenliki melum bolmaqta

Muxbirimiz shöhret hoshur
2016-11-25
Élxet
Pikir
Share
Print
Xitay izdewatqan abduweli haji
Xitay izdewatqan abduweli haji
Photo: RFA


Radiyomizgha yollan'ghan inkasta inisi atushta tutqun qilin'ghan, özi türkiyege chiqip ketken abduweli hajining bir yildin buyan iz-dériki yoqluqi, uning iz-déreksizliki xitay saqchilirini bi'aram qiliwatqan bolsa, uning atushtiki a'ile-tawabi'atini endishige séliwatqanliqi yézilghan. Muxbirimiz bügün abduweli hajining kimliki we nöwettiki ehwali heqqide melumat égiliduq. Netijide, istanbul bilen ürümchi arisida kiyim-kéchek sodisi qiliwatqan abduweli hajining ajizlargha yardem qilip kéliwatqan bir xeyr-saxawetchi ikenliki melum boldi.

Hörmetlik radiyo anglighuchilar, biz abduweli hajining xitay saqchiliri teripidin néme üchün izdiliwatqanliqini éniqlash üchün atushtiki saqchilargha téléfon qilduq. Saqchilar bu heqte melumat bérishtin özlirini qachurdi.

Abduweli haji heqqide bizge yollan'ghan mektupta, abduweli hajining hazirgha qeder birer siyasiy we ijtima'iy teshkilatlargha qétilmighanliqi, peqet bir qisim xeyr-saxawet ishliri bilen shughullanliqi üchün, uning türkiye sepiridin xitay saqchilirining bi'aram bolghanliqi yeni uning türkiyediki teshkilatlar bilen hemkarliship qélishidin endishe qilghanliqi bayan qilin'ghan. Bügün radiyomizgha kelgen yene bir inkasta, saqchilarning abduwelini türkiyedin qayturup ekilish üchün inisi rishat hajidin bashqa yene, uning dadisi haji ablimit we bir hedisinimu burun bir mehel qamap qoyghanliqi tilgha élin'ghan. Bügün téléfonimizgha jawab bergen haji ablimit, oghli abduwelining saqchilar teripidin izdilish sewebi we özining qamap qoyulghanliqi heqqide melumat bérishni ret qildi. U peqet oghlining tijaret we xeyr-saxawet ishliri heqqidila töwendikiche melumat berdi.

Uning déyishiche, abduwelining ürümchi, qeshqer, atush, maralwéshi qatarliq jaylarda 8 kéyim-kéchek dukini bolghan. U, yétim-yésir we méyiplargha yardem bérish qatarliq bir qatar xeyr-saxawet ishliri bilen shughullan'ghan.

Biz abduweli hajining nöwettiki ehwalini bilip béqish üchün türkiyege téléfon qilduq. Istanbuldiki pishqedem Uyghur pa'aliyetchiliridin hamut köktürk ependi, nöwette istanbulda Uyghurlar sanining köpiyip ketkenlikini, shunga bundaq bir kishining kimliki we ish-izliridin xewersizlikini éytti.

Hörmetlik radiyo anglighuchilar, radiyomiz yéqinda élan qilghan bir xewerde, Uyghur rayonidiki saqchilarning nöwette Uyghurlar ichidiki xeyr-saxawetchilerge qarita közitishining sezgürleshkenliki we ularni ujuqturushqa ötkenliki melum qilin'ghan. Abduweli hajining iz-déreksizliki we uning a'ilisining nöwettiki ehwali ene shu xil weziyetning jiddiylikidin bisharet bermekte.

Toluq bet