Türkiyede xitaygha bolghan naraziliq künsayin kücheymekte

Ixtiyariy muxbirimiz erkin tarim
2014.07.23
Share on WhatsApp
Share on WhatsApp
turkiye-kadirlar-oyushmisi-binasi-kok-bayraq.JPG Türkiye kadirlar uyushmisi bu yilliq ramzan mezgilde sherqiy türkistanning ay-yultuzluq kök bayriqini öz xizmet binasigha ésip Uyghur xelqni qollaydighanliqini bildürgen. 2014-Yili iyul.
RFA/Erkin Tarim

Türkiyediki eng chong ammiwi teshkilatlardin türkiye kadirlar uyushmisi bu yilliq ramzan mezgilde sherqiy türkistanning ay-yultuzluq kök bayriqini öz xizmet binasigha ésip Uyghur xelqni qollaydighanliqini bildürgen.

Uyghurlarni qollash yüzisidin sherqiy türkistan bayriqini öz binasigha asqan organlar ammiwi jem'iyetler bilenla cheklinip qalmighan.

Bu nöwet yene türkiyening samsun sheherlik hökümet öz xizmet binasigha sherqiy türkistanning ay-yultuzluq kök bayriqini asqan.

Bu heqte toxtalghan türkiye kadirlar uyushmisining mu'awin re'isi xitayning Uyghurlargha qaratqan diniy cheklimisige étiraz bildürüsh üchün ay-yultuzluq kök bayraqni asqanliqini bildürdi.

Türkiyediki ammiwi teshkilatlar we sheherlik hökümetler Uyghur mesilisini izchil halda küntertipke élip kélish arqiliq xitaygha bolghan naraziliqini ipadilimekte.

Musulmanlarning muqeddes ayliridin biri bolghan ramzan éyi boyiche, diniy alimlar téléwiziye programmilirida, siyasetchiler we her derijilik kadirlar ammiwi teshkilatlar iptar ziyapetliride islam dunyasidiki tragédiyilerni tilgha alghanda Uyghurlar uchrawatqan insan heqliri depsendichiliklirini bolupmu Uyghurlarning étiqad erkinlikini cheklesh mesilisinimu alahide tilgha élip ötmekte.

Türk ammiwi teshkilatliri her hepte dégüdek xitay elchixanisi aldida iptar qilish arqiliq xitay hökümitige bolghan naraziliqini bildürüshmekte.

Kishilerni eng jelp qilarliqi shuki, enqerening merkizige jaylashqan 450 ming etrapida ezagha ige türkiye kadirlar uyushmisi bilen samsun sheherlik hökümetke oxshash idare-jem'iyetler binasining aldigha türkiye, türkmen éli we pelestin bayraqliri bilen birlikte sherqiy türkistanning ay yultuzluq kök bayraqliriningmu ésilghanliqi.

Türkiyening eng chong téléwiziyeliridin qanal 7 téléwiziyesining sohurluq diniy söhbet programmisigha chiqiwatqan diniy ilimler alimi ömer döngel ependi yighlap turup qolini égiz kötürüp Uyghurlarning erkinliki üchün du'a qilmaqta. Dangliq diniy alim jübbeli exmet mollammu her küni dégüdek téléwiziye programmisida Uyghurlar üchün du'a qilmaqta.

7 Qewetlik türkiye kadirlar uyushmisining binasigha chong kök bayraqni asqan uyushmining mu'awin re'isi fahrettin yoqush ependi, bu bayriqini xitayning Uyghurlargha élip bériwatqan bésim siyasitige naraziliq bildürüsh üchün asqanliqini bayan qildi.

U mundaq dédi: sizgimu melum. Ramzan éyining kirishi bilen birlikte hem islam hemde türk dunyasida échinishliq weziyet meydan'gha keldi. Bularning zor bir qismi xitayda sherqiy türkistanliqlargha élip bériliwatqan zulumdin ibaret. Ramzan éyining kirishi bilen sherqiy türkistandiki qérindashlirimiz ibadet qilghanliqi üchün bésimgha hetta qirghinchiliqqa uchrawatidu. Biz buninggha naraziliq bildürüsh üchün 20-25 kündin béri binayimizgha sherqiy türkistanning ay-yultuzluq kök bayriqi ésiqliq.

U, bu muqeddes ramzan éyida allahtin sherqiy türkistanliqlarning baldurraq xitay zulumdin qutulushini tileydighanliqini bildürdi.

U mundaq dédi: biz sherqiy türkistanliqlarni baldurraq xitay zulumdin qutular, xitay basqunchiliridin xitay bésimidin qutular dep oylaymiz. Biz sherqiy türkistan üchün küresh qiliwatqan rabiye qadir xanim bashchiliqidiki pütün Uyghur qérindashlirimizgha éhtiram bildürimiz. Ularni qollap-quwwetleydighanliqimizni bildürimiz. Ramzan éyida könglimiz bekla yérim. Sherqiy türkistanliqlar rozi héytini rahet ötküzelmesliki mumkin, emma siler könglünglarni yérim qilmanglar, biz allahtin silerning yéqin kelgüside musteqilliqqa érishishinglarni tileymiz. Bu ramzan éyining Uyghur qérindashlirimizgha yéngiliqlar élip kélishini tileymiz.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.