Хотәндики мәктәп балилириниң бу йиллиқ рамизан билән язлиқ тәтилдә дуч кәлгән қисмәтлири

Мухбиримиз қутлан
2015-07-30
Share
tetil-siyasiy-uginish-ramizan-ramzan-305.jpg Тәтил мәзгилидә сиясий өгинишкә йиғивелинған ләңгәр башланғуч мәктәп оқуғучилири. 2012-Йили 20-июл.
http://ui.xjsfedu.com


Нәқ мәйдандин игилигән учур вә мәлуматлар бу йиллиқ рамизан билән язлиқ тәтилниң хотәндики мәктәп балилири үчүн нормал дәм елиш болмастин, бәлки төмүр пәрдә ичидики реҗим болғанлиқини ашкара қилмақта.

Хотән вилайитиниң лоп наһийәлик маарип идарисида 9 йиллиқ мәҗбурийәт маарипи бойичә оқуғучиларниң сиясий - идийә хизмитигә мәсул бир кадирниң билдүрүшичә, бу йиллиқ рамизан билән язлиқ тәтил мәзгилидә оқуғучиларниң һәр күнлүк паалийити қатламму - қатлам қаттиқ контроллуққа елинған.

Нам - шәрипини ашкарилашни халимайдиған маарип саһәсидики мәзкур кадирниң ейтишичә, бу йиллиқ рамизан мәзгилидә хотәндики барлиқ оттура, башланғуч мәктәпләрдики оқутқучилар билән оқуғучиларға бир туташ мәктәптин тамақ берилгән.

Хотән вилайитидики 9 йиллиқ мәҗбурийәт маарипи йешидики һәр бир оқуғучиға аптоном райондин “намрат вилайәткә берилидиған ярдәм” дегән вивиска билән күнигә 4 сомдин тамақ пули берилгән. Хотәндики йәрлик маарип идарилири рамизан мәзгилидә йоқиридин кәлгән бу пулни дәсмайә қилип мәктәпләрдә оқутқучи, оқуғучиларни һәқсиз чүшлүк тамақ билән тәминлигән.

Мәзкур кадирниң баянлириға қариғанда, оқуғучилар һазир гәрчә язлиқ тәтилгә қоюп берилгән болсиму, лекин һәр һәптиниң җүмә күни мәҗбурий һалда мәктәпкә йиғивелинидикән. Җүмә күнидә маарип идарисидин һәрқайси мәктәпләргә әвәтилгән мәсул хадимлар бир һәптидин буян оқуғучиларниң өйлиридә немә иш қилғанлиқи һәққидики доклатни аңлайдикән. Оқутқучилар мәктәп мудириниң орунлаштуруши бойичә һәр һәптидә бир қетимдин оқуғучиларниң өйлиригә айрим - айрим берип, уларниң ата - анилириға балилириниң һәр күни немини қилиши вә немини қилмаслиқи һәққидә йоқириниң бәлгилимилирини сөзләйдикән. Адәттә наһийәлик маарип идарисидики рәһбирий кадирлар билән һәрқайси мәктәп мудирлири оттурисида, мәктәп мудирлири билән һәр бир синип мәсуллири оттурисида, синип тәрбийәчилири билән ата, анилар оттурисида қатламму - қатлам мәсулийәт тохтамнамиси имзалинидикән.

Ундин башқа, язлиқ тәтилдики һәр җүмә күни оқуғучилар толуқ һалда мәктәпкә йиғивелинип, сиясий өгинишкә уюштурулидикән. Чүштин кейин оқуғучилар аталмиш “диний әсәбийлик” кә вә “милләт бөлгүнчилики” гә қарши туридиған шундақла “милләтләр иттипақи” ни мәдһийәләйдиған сиясий лексийәр аңлайдикән.

Мәзкур кадир йәнә бу йил язлиқ тәтилдә хотәндики мәктәп балилириниң һәр җүмә күни мәктәпкә йиғилип, хотән вилайәтлик парткомниң секритари билән хотән вилайитиниң валийси айрим - айрим һалда сөзлигән мәхсус һөҗҗәтни өгинидикән. Мәзкур һөҗҗәттә мәктәп балилириниң миллий һессиятни қандақ қилип тоғра ипадиләшни өгиниш вә қәлбидә қандақ қилип “җуңхуа вәтини” гә болған муһәббитини йетилдүрүш мәсилилири сөзләнгән икән.

Тәпсилатини аваз улиништин аңлиғайсиз.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт