Xotendiki mektep balilirining bu yilliq ramizan bilen yazliq tetilde duch kelgen qismetliri

Muxbirimiz qutlan
2015-07-30
Élxet
Pikir
Share
Print
Tetil mezgilide siyasiy öginishke yighiwélin'ghan lengger bashlan'ghuch mektep oqughuchiliri. 2012-Yili 20-iyul.
Tetil mezgilide siyasiy öginishke yighiwélin'ghan lengger bashlan'ghuch mektep oqughuchiliri. 2012-Yili 20-iyul.
http://ui.xjsfedu.com


Neq meydandin igiligen uchur we melumatlar bu yilliq ramizan bilen yazliq tetilning xotendiki mektep baliliri üchün normal dem élish bolmastin, belki tömür perde ichidiki réjim bolghanliqini ashkara qilmaqta.

Xoten wilayitining lop nahiyelik ma'arip idarisida 9 yilliq mejburiyet ma'aripi boyiche oqughuchilarning siyasiy - idiye xizmitige mes'ul bir kadirning bildürüshiche, bu yilliq ramizan bilen yazliq tetil mezgilide oqughuchilarning her künlük pa'aliyiti qatlammu - qatlam qattiq kontrolluqqa élin'ghan.

Nam - sheripini ashkarilashni xalimaydighan ma'arip sahesidiki mezkur kadirning éytishiche, bu yilliq ramizan mezgilide xotendiki barliq ottura, bashlan'ghuch mekteplerdiki oqutquchilar bilen oqughuchilargha bir tutash mekteptin tamaq bérilgen.

Xoten wilayitidiki 9 yilliq mejburiyet ma'aripi yéshidiki her bir oqughuchigha aptonom rayondin "Namrat wilayetke bérilidighan yardem" dégen wiwiska bilen künige 4 somdin tamaq puli bérilgen. Xotendiki yerlik ma'arip idariliri ramizan mezgilide yoqiridin kelgen bu pulni desmaye qilip mekteplerde oqutquchi, oqughuchilarni heqsiz chüshlük tamaq bilen teminligen.

Mezkur kadirning bayanlirigha qarighanda, oqughuchilar hazir gerche yazliq tetilge qoyup bérilgen bolsimu, lékin her heptining jüme küni mejburiy halda mektepke yighiwélinidiken. Jüme künide ma'arip idarisidin herqaysi mekteplerge ewetilgen mes'ul xadimlar bir heptidin buyan oqughuchilarning öyliride néme ish qilghanliqi heqqidiki doklatni anglaydiken. Oqutquchilar mektep mudirining orunlashturushi boyiche her heptide bir qétimdin oqughuchilarning öylirige ayrim - ayrim bérip, ularning ata - anilirigha balilirining her küni némini qilishi we némini qilmasliqi heqqide yoqirining belgilimilirini sözleydiken. Adette nahiyelik ma'arip idarisidiki rehbiriy kadirlar bilen herqaysi mektep mudirliri otturisida, mektep mudirliri bilen her bir sinip mes'ulliri otturisida, sinip terbiyechiliri bilen ata, anilar otturisida qatlammu - qatlam mes'uliyet toxtamnamisi imzalinidiken.

Undin bashqa, yazliq tetildiki her jüme küni oqughuchilar toluq halda mektepke yighiwélinip, siyasiy öginishke uyushturulidiken. Chüshtin kéyin oqughuchilar atalmish "Diniy esebiylik" ke we "Millet bölgünchiliki" ge qarshi turidighan shundaqla "Milletler ittipaqi" ni medhiyeleydighan siyasiy léksiyer anglaydiken.

Mezkur kadir yene bu yil yazliq tetilde xotendiki mektep balilirining her jüme küni mektepke yighilip, xoten wilayetlik partkomning sékritari bilen xoten wilayitining waliysi ayrim - ayrim halda sözligen mexsus höjjetni öginidiken. Mezkur höjjette mektep balilirining milliy héssiyatni qandaq qilip toghra ipadileshni öginish we qelbide qandaq qilip "Jungxu'a wetini" ge bolghan muhebbitini yétildürüsh mesililiri sözlen'gen iken.

Tepsilatini awaz ulinishtin anglighaysiz.

Toluq bet