Хотәндики ярдәмчи сақчилар: "биз муқимлиқ үчүн ялланған, әмма қорал-ярағсиз сақчилармиз!"

Мухбиримиз қутлан
2017-04-26
Share
uyghur-yallanma-sakqi.jpg Уйғур ялланма сақчи. (Вақти вә орни ениқ әмәс)
Social Media

Нөвәттә уйғур елиниң җай-җайлиридики сақчиханиларниң йүзләп ярдәмчи сақчи қобул қиливатқанлиқи, һәтта бир қисим чегра наһийәлири юқири мааш вә алаһидә тәминат билән хитай өлкилиридин биваситә сақчи қобул қиливатқанлиқи мәлум болмақта.

14-Февралдики гума пичақлиқ һуҗумидин кейин хотән вилайитиниң һәрқайси наһийәлири җиддий уқтуруш чиқирип, нәччә йүзлигән ярдәмчи сақчи, чарлаш хадими вә бихәтәрлик тәкшүрүш хадими қобул қилидиғанлиқини билдүргән.

Ундақта бу қәдәр җиддий түрдә қобул қилиниватқан ярдәмчи сақчилар зади қандақ конкрет вәзипиләрни атқурмақта? хитай һөкүмитиниң йәрлик уйғур ярдәмчи сақчиларға болған ишиниш дәриҗиси зади қанчилик?

Бу соалларға хотәндики сақчиханиларда кечә-күндүз дәм алмай көзәтчилик қиливатқан уйғур ярдәмчи сақчиларниң баянлири җаваб бериду.

Хотәнниң керийә наһийә сийәк йезилиқ сақчиханисидики бир нәпәр ярдәмчи сақчи радийомиз зияритини қобул қилғанда, "гәрчә биз сақчи формиси кийип вәзипә иҗра қилсақму, әмма қорал-ярағ тутуш һоқуқимиз йоқ, пәқәтла нәйзә, қалқан вә калтәк тутимиз," деди.

Гума наһийәсиниң мокуйла йезилиқ сақчиханисидики бир нәпәр ярдәмчи сақчи өзлириниң вәзипә даирисиниң омумән муқимлиққа мунасивәтлик һәрқандақ ишни өз ичигә алидиғанлиқини, һалбуки, өзлириниң қорал-ярағ тутуш һоқуқиниң йоқлуқини, җиддий йүз бәргән вәқәләрни алаһидә сақчи яки рәсмий қораллиқ сақчиларниң бир тәрәп қилидиғанлиқини билдүрди.

У йәнә сақчиханиларниң ярдәмчи сақчи қобул қилишта аилә арқа көрүнүшигә қаттиқ тәләп қойидиғанлиқини, аилисидә яки уруқ-туғқанлири арисида "сиясий җинайәт" садир қилғанларниң сақчилиққа қобул қилинмайдиғанлиқини ашкарилиди.

Қарақаш наһийәсиниң ақсарай йезилиқ сақчиханисидики бир нәпәр ярдәмчи сақчи зияритимиз давамида ярдәмчи сақчи қобул қилишта омумән "сиясий мәсилиси" болмисила башқа шәртләрниң анчә еғир әмәсликини, сиясий арқа көрүнүшиниң "пакизә" болушиниң әң алдинқи шәрт қилинидиғанлиқини билдүрди. Әмма у сиясий арқа көрүнүши шунчә қаттиқ тәкшүрүлгән, үч әвлад аилә тарихида һечқандақ мәсилә көрүлмигән болушиға қаримай, уйғур ярдәмчи сақчиларниң қорал тутуш һоқуқиниң йоқлуқини илгири сүрди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт