Xotendiki yardemchi saqchilar: “Biz muqimliq üchün yallan'ghan, emma qoral-yaraghsiz saqchilarmiz!”

Nöwette Uyghur élining jay-jayliridiki saqchixanilarning yüzlep yardemchi saqchi qobul qiliwatqanliqi, hetta bir qisim chégra nahiyeliri yuqiri ma'ash we alahide teminat bilen xitay ölkiliridin biwasite saqchi qobul qiliwatqanliqi melum bolmaqta.

14-Féwraldiki guma pichaqliq hujumidin kéyin xoten wilayitining herqaysi nahiyeliri jiddiy uqturush chiqirip, nechche yüzligen yardemchi saqchi, charlash xadimi we bixeterlik tekshürüsh xadimi qobul qilidighanliqini bildürgen.

Undaqta bu qeder jiddiy türde qobul qiliniwatqan yardemchi saqchilar zadi qandaq konkrét wezipilerni atqurmaqta? xitay hökümitining yerlik Uyghur yardemchi saqchilargha bolghan ishinish derijisi zadi qanchilik?

Bu so'allargha xotendiki saqchixanilarda kéche-kündüz dem almay közetchilik qiliwatqan Uyghur yardemchi saqchilarning bayanliri jawab béridu.

Xotenning kériye nahiye siyek yéziliq saqchixanisidiki bir neper yardemchi saqchi radiyomiz ziyaritini qobul qilghanda, “Gerche biz saqchi formisi kiyip wezipe ijra qilsaqmu, emma qoral-yaragh tutush hoquqimiz yoq, peqetla neyze, qalqan we kaltek tutimiz,” dédi.

Guma nahiyesining mokuyla yéziliq saqchixanisidiki bir neper yardemchi saqchi özlirining wezipe da'irisining omumen muqimliqqa munasiwetlik herqandaq ishni öz ichige alidighanliqini, halbuki, özlirining qoral-yaragh tutush hoquqining yoqluqini, jiddiy yüz bergen weqelerni alahide saqchi yaki resmiy qoralliq saqchilarning bir terep qilidighanliqini bildürdi.

U yene saqchixanilarning yardemchi saqchi qobul qilishta a'ile arqa körünüshige qattiq telep qoyidighanliqini, a'iliside yaki uruq-tughqanliri arisida “Siyasiy jinayet” sadir qilghanlarning saqchiliqqa qobul qilinmaydighanliqini ashkarilidi.

Qaraqash nahiyesining aqsaray yéziliq saqchixanisidiki bir neper yardemchi saqchi ziyaritimiz dawamida yardemchi saqchi qobul qilishta omumen “Siyasiy mesilisi” bolmisila bashqa shertlerning anche éghir emeslikini, siyasiy arqa körünüshining “Pakize” bolushining eng aldinqi shert qilinidighanliqini bildürdi. Emma u siyasiy arqa körünüshi shunche qattiq tekshürülgen, üch ewlad a'ile tarixida héchqandaq mesile körülmigen bolushigha qarimay, Uyghur yardemchi saqchilarning qoral tutush hoquqining yoqluqini ilgiri sürdi.