Yaponiye parlamént binasida chaqirilghan ilmiy muhakime yighinida Uyghur mesilisi anglitildi

Yaponiye parlamént binasida chaqirilghan ilmiy muhakime yighinida yaponiye hawa armiyisining sabiq bash qomandani, général iwanaga ependi söz qilmaqta. 2017-Yili 7-mart, yaponiye.

7-Mart yaponiye parlaméntida chaqirilghan 49-nöwetlik yaponiye kuri'atké uyushmisi asiya munbirining ilmiy muhakime yighinida Uyghur mesilisi anglitildi.

Yighinda yaponiye parlamént ezasi wada masumuné, yaponiye hawa armiyesining généralliridin imamichi qatarliqlar teripidin yaponiyening nöwettiki siyasiy weziyiti we amérika bilen bolghan hemkarliqliri toghrisida doklat bérilgen bolup, undin bashqa yighinda yene, yaponiye Uyghur birliki teshkilatining re'isi turmuhemmet hashim Uyghur mesilisi toghrisida doklat bergen.

Yaponiye parlamént binasining yighin zalida chaqirilghan bu qétimqi ilmiy muhakime yighinigha 400 din oshuq kishi qatnashqan bolup, yighin shu küni kech sa'et altidin sekkiz yérimgha qeder dawam qilghan.

Yaponiye parlaménti yighin zalida chaqirilghan 49-nöwetlik yaponiye kuritaké uyushmisi asiya munbirining ilmiy muhakime yighinidin kéyin, téléfon ziyaritimizni qobul qilghan yaponiye Uyghur birliki teshkilatining re'isi turmuhemmet hashim yighinda aldi bilen özining sözge teklip qilin'ghanliqini bildürdi.

Turmuhemmet hashimning bildürüshiche, yighinda yaponiye parlamént ezaliridin wada masamuné yaponiye hökümitining amérika bilen birlikte xitayning sherqiy jenubi asiya elliridiki arallargha bolghan tehditlirige qarshi turidighanliqi shundaqla ikki dölet arisidiki türlük hemkarliqlarni kücheytip yaponiyening amérika bilen bolghan munasiwitini téximu kücheytidighanliqi toghrisida tepsiliy doklat bergen.

Melum bolushiche, yaponiye parlamént ezasi wada masamuné yaponiye qelb partiyesi siyasiy byurosining mes'ulliridin biri bolup, u ötken yili noyabir éyida yaponiye Uyghur birliki teshkilati teripidin tokyoda ötküzülgen tarixtiki sherqiy türkistan jumhuriyetlirining xatire künini tebriklesh murasimida “Yaponiye dölet siyasitide Uyghur mesilisi” dégen témida mexsus doklat sözlep, doklatida özining bir qanche qétim yaponiye parlaméntida Uyghur kishilik hoquq mesilisige da'ir bezi bir layihilerni otturigha qoyghanliqini, bolupmu 2009-yilidiki 5-iyul ürümchi weqesi heqqide yaponiye bash weziri shinzo abédin so'al sorighanliqini qeyt qilghan shundaqla u, özining yéqinda yaponiye parlaméntida xitaydiki mehbuslarning ichki ezalirini yötkep sétish qilmishigha qarshi bir teklip layiheni otturigha qoyidighanliqini bildürgen idi.

Turmuhemmet hashimning éytishiche, yaponiye hawa armiyisining sabiq bash qomandani, géniral iwanaga yaponiyening hazirghiche xitayning hawa hujumlirigha uchrash ehwali toghrisida doklat bergen we shundaqla yaponiye hawa armiyesining xitayning hawa hujumlirigha kelgüside qandaq shekilde taqabil turushi kéreklikidin ibaret yaponiye hawa armiyesining istratégiyelik pilanliri toghrisida toxtalghan.

Yighin'gha ishtirak qilghan yaponiyelik ataqliq zhurnalistlardin sato ziyaritimizni qobul qilip: “Bügünki yighin nahayiti yaxshi boldi dep oylaymen. Men bu qétimqi yighin arqiliq yaponiye hökümitining bezi bir yéngi tashqi siyasetliridin xewerdar boldum” dédi.

Yaponiye kuritaké uyushmisi asiya munbirining mudiriyet ezaliridin imamuchi yighin heqqide toxtilip: “Yighinimiz köngüldikidek boldi. Yighinda yaponiyede hel qilishqa tégishlik bezi siyasiy mesililer otturigha qoyulush bilen birge, Uyghur mesilisimu tilgha élinip, yighin ehlini nöwettiki Uyghur weziyitidin xewerdar qilduq we köpchilikni Uyghur mesilisige köngül bölüshke chaqirduq” dédi.

Yaponiye Uyghur birliki teshkilatidin igilishimizche, yaponiyediki nopuzluq ammiwi teshkilatlardin biri bolghan kuritaké uyushmisi asiya munbiri yaponiyediki Uyghur mesilisige yéqindin köngül bölüp kéliwatqan teshkilatlardin biri bolup, ötken ayda yaponiyede ziyarette bolghan Uyghur milliy herikitining rehbiri rabiye qadir xanim bashchiliqidiki Uyghur wekiller ömikige sahibxana bolghan.

Yuqiriqi awaz ulinishidin tepsilatini anglighaysiz.