Yopurghida 17 yashliq yaqupjan namanning "Terbiyilesh merkizi" de ölgenliki ashkarilandi

Muxbirimiz shöhret hoshur
2018-03-09
Élxet
Pikir
Share
Print
Ikki neper xitay saqchisining "Terbiyelesh merkizi" ning aldida turghan körünüshi. 2017-Yili 2-noyabir, korla.
Ikki neper xitay saqchisining "Terbiyelesh merkizi" ning aldida turghan körünüshi. 2017-Yili 2-noyabir, korla.
AP Photo/Ng Han Guan

Yopurgha weziyitidin xewerdar kishilerdin birining radiyomizgha melum qilishiche, ötken hepte yopurgha saqchiliri yekshenbebazar yézisidiki hünerwen naman qarigha uning "Terbiyilesh merkizi" diki 17 yashliq oghlining jesitini qayturup bergen. Naman qari oghlining ölüm sewebini sorashqimu amalsiz qalghan we saqchilarning nazariti astida méyitni yerlikke qoyghan. Muxbirimizning bu uchurgha asasen ehwal éniqlishi dawamida weqening buningdin 10 kün awwal yüz bergenliki, ölgüchining yopurgha nahiye yekshenbebazar yéza 12‏-kenttiki 17yashliq yaqupjan naman ikenliki aydinglashti.

Weziyettin xewerdar bir kishining radiyomizgha bayan qilishiche, yopurgha nahiyisining yekshenbebazar yézisida qulupchiliq kespi bilen tirikchilik qiliwatqan naman qarining eyni chaghda 15yashqa kirgen oghli 2016‏-yili dostliri bilen birlikte türkiyege sayahetke barghan. Oghlining türkiyege bérishi we bu yerde turup qélishidin néme üchündur endishe qilghan naman qari türkiyege derhal yétip bérip, oghlini yurtigha qayturup eketken.

Naman qarining oghli dadisining qistishi bilen türkiyede peqet 4 künla turush pursitige érisheligen. Naman qari oghlini türkiyedin aktipchanliq bilen eketken. Naman qarining oghli türkiyede uzun turmighan bolsimu, emma "Yépiq terbiye" ge tutqun bashlan'ghanda u yenila "Qara tizimlik" ning eng béshidin orun alghan. Ehwaldin xewerdar kishining bayan qilishiche, yopurgha nahiyisidiki saqchi xadimliri ötken hepte naman qarining "Terbiyilesh" tiki 17 yashliq oghlining jesitini élip chiqip bergen we derhal yerlikide qoyushqa buyrughan. Ölüm sewebi heqqidimu izahat bermigen. 

Inkaslardin melum bolushiche, rayonda "Yépiq terbiye" bashlan'ghandin buyan, "Terbiye" ge ekitilgenlerning iz-dérikini qilghanlar, chékiti bar kishiler bilen alaqe qilish eyiplimisi bilen tutuluwatqan we "Terbiye" liniwatqanliqi melum. Hetta tutqunlarning a'ile-tawabi'atlirimu, qérindashlirining iz-dérikini qilghanliqi üchünla idiyeside mesile dep qarilip tutulghan. Xitay da'irilirining yéqinqi aylardin buyan radiyomiz muxbirlirining téléfon ziyaretlirige qarita qollan'ghan téxnikiwiy tosalghuliri sewebidin, naman qarining oghlining ölümi heqqidiki éniqlishimiz bek rawan bolmidi. Téléfon baghlinip bir minutqa barmastin üzülüp kétishi sewebidin naman qarining oghli apirilghan "Terbiyilesh lagéri", ölüm sewebi we yerlikke qoyulush jeryani heqqide melumat alalmiduq. Izchil we tekrar urulghan téléfonlar netijiside namanqarining 17 yashliq oghlining ismining yaqupjan ikenliki, yekshenbebazarning 12‏-kentige nopusluq ikenliki we 10 künning aldida jan üzgenliki aydinglashti.

Toluq bet