Йәкәндә көтүрүлгән исянда аз дегәндә 120 киши өлгәнлики илгири сүрүлмәктә

Икки күндин бери йәкәндә арқа-арқидин қанлиқ тоқунушлар йүз бәргәнлики вә вәқәдә көплигән кишиләрниң өлгәнлики һәққидә ғәйрий рәсмий учурлар тарқалмақта. Шинхуа агентлиқи йәкәндики вәқәдә 13 киши өлгәнликини баян қилған болсиму, вәқәниң көлими вә тәпсилати һәққидә мәлумат бәрмиди.

Мухбиримизниң бүгүн йәкән илишқудики кәнт мәсуллири вә аһалиләрдин игилишичә, бир нәччә гуруппа кишиләр 28-июл күни сәһәрдә ишқул йезилиқ сақчихана вә йезилиқ һөкүмәткә һуҗум қилған. Сақчилар нәқ мәйданға йетип келип вәқәни бесиқтурғандин кейин йәнә, бу йезиниң 14-, 15- вә 24-кәнтлиридин бир түркүм кишиләр қозғилип палта-кәкә вә пичақлар билән тәвәликтики кәнт ишханилири, һөкүмәт аптомобиллири вә йол үстидики хитай көчмәнлиригә һуҗум қилған.

Мәлум бир нөвәтчи хадиминиң радиомизға баян қилишичә, вәқәдә аз дегәндә 120 киши өлгән. Әмма, өлгүчиләрниң қанчә нәпириниң исянчилар тәрәптин, қанчә нәпириниң хитай тәрәптин икәнлики һазирчә мәлум әмәс.

Юқиридики аваз улинишидин, мухбиримизниң вәқә йүз бәргән илишқу кәнтидин игилигән мәлуматлириниң тәпсилатини аңлиғайсиләр.