Yéngibagh yézisida az dégende 7 kishining lagérda ölgenliki ashkarilandi

Muxbirimizning yighiwélish lagérliri heqqide kériye nahiyisige qarita élip barghan téléfon ziyaretliri dawamida, yéngibagh yézisidin terbiyeleshke ekitilgenlerdin 242 kishining bankigha qerzige barghanliqi, bulardin yette nepiri lagérda jan üzgenliki üchün bankining ularning qerzini kötürüwetkenliki ashkarilandi.

Xitay da'iriliri yighiwélish lagérlirining mewjutluqi we ehwalini sir tutushqa tirishqan'gha oxshashla, hetta uningdin bekrek lagérdikilerning salametlik ehwali, bolupmu lagérda jan üzgenlerning sani heqqidiki melumatlarnimu izchil halda sir tutup kelmekte. Shunga biz bu sirni échish üchün Uyghur rayonidiki saqchixanilargha élip barghan téléfon ziyaretlirimiz dawamida lagérdiki ölüm hadisiliri heqqide izchil halda melumat soriduq.

Téléfonimizni qobul qilghan kériye nahiyisining yéngibagh yéziliq saqchi xadimi, gerche öz yézisidin minglarche kishining terbiyeleshke ekitilgenlikidin xewiri barliqini éytqan bolsimu, emma lagérda jan üzgenlerdin peqetla xewersizlikini éytti.

Yéngibagh yéziliq edliye ponkiti xadimimu, lagérda salametliki nacharlashqanlarning dawalitiliwatqanliqini, emma ölgenler heqqide özining uchur anglimighanliqini éytti.

Téléfonimiz baghlan'ghan yéngibagh yéziliq yéza igilik banka qerz amanet kopiratip mudiri, terbiyeleshtikilerge banka terepning qandaq étibar bériwatqanliqi heqqidiki so'alimizgha jawaben, özi wezipe ötewatqan kopiratipning bu bir yil ichide terbiyileshte jan üzgen 7 kishining qerzini kötürüwetkenlikini bayan qildi.

Bayan qilinishiche, yéngibagh yézisidin terbiyeleshke ekitilgenlerdin 242 nepirining bankigha qerzi bar bolup, bulardin 7 nepiri lagérda jan üzgen, banka bularning ölüm ispat xéti qatarliq matériyallirini alaqidar sughurta shirkitige yollighan. Sughurta shirkiti bulardin hazirgha 4 nepirining qerzini bankigha tölep bergen. Banka nöwette qalghan 3 nepirining ölüm ispat xétini sughurta shirkitige yollash üchün teyyarlimaqta.

Bu banka amanliq mudiri bu terbiyileshte jan üzgenlerning burundin özide bar bolghan késellik sewebidin ölgenlikini bayan qilghan bolsimu, emma lagérda ölgen bu 7 kishining yéshining 31 yash bilen 42 yash arisida ikenliki, ularning ölümige asasen lagérning seweb bolghanliq éhtimalliqini küchlendürmekte.

Melum bolushiche yéngibagh yézisi kériye nahiye baziridin 10 kilométir uzaqliqqa jaylashqan, 12 kenttin terkib tapqan, nopusi 10 minggha barmaydighan kichik yézilardin biri. Bu yézidin zadi qanchilik kishining lagérda ikenliki melum emes. Mana mushundaq bir kichik yézidin, uning üstige bankigha qerzi bolghan 242 kishidin 7 nepiri lagérda jan üzgen iken, undaqta yéza we nahiye boyiche, hetta aptonom rayon boyiche qanchilik kishining lagérda jan üzgenliki lagér heqqidiki sirliq we endishilinerlik melumatlar qatarida turmaqta.