"тәрбийәләш мәркизи" дин қутулуп чиққан тунҗи гуваһчи билән сөһбәт (3)

Мухбиримиз гүлчеһрә
2018-01-25
Share
omurbek-eli-yepiq-terbiyelesh-1-305.jpg Өмүрбәк әлиниң "йепиқ тәрбийәләш мәркизи" дин чиққан вақти. 2017-Йили ноябир, алмута.
Ömürbek Eli özi teminligen

Өмүрбәг әли қарамайдики "йепиқ тәрбийәләш мәркизи" дә өзиниң чәтәллик, йәни қазақистан пуқраси икәнликидә чиң туруп, даириләрниң бу җайдики пүтүнләй хитай тилида елип бериливатқан мәҗбурий вәтәнпәрвәрлик тәрбийәси вә һәрбий мәшиқлирини рәт қилған. "мәркәз" дики сақчи кадирлар униң бу қаршилиқи үчүн, уни 4 күнчә дәрс вақтида саәтләп өрә турғузуп қоюш арқилиқ җазалиған. Өмүрбәгдә өзгириш болмиғандин кейин, у һақарәт вә зорлуқ-зомбулуққа учриған.

Өмүрбәгниң ейтишичә, "тәрбийәләш мәркизи" дики қаттиқ түзүмдә башқиларниң бу җайдики адаләтсизликләргә, дәпсәндичиликкә сүкүттә турмай вә көнмәй амали йоқкән. Қаршилиқ қилишқа техиму имкансиз икән. Әмма униң қазақистан пуқраси болғанлиқидәк алаһидә салаһийити болғини үчүнла у "мәркәз" сақчилириниң зораванлиқиға қаршилиқ көрситишкә тәвәккүл қилалиған икән. Һалбуки у ахирида калтәк-тоқмақлиқ 4 сақчи тәрипидин қоллири башқидин кишәнлинип айримханиға қамалған, пүтүнләй йепиқ, деризисиз айримханида дақ йәрдә он нәччә күнни өткүзгән.

Өмүрбәг "тәрбийәләш мәркизи" гә елип келинип 19-күнигә қәдәр, өзиниң әһвалини аилисидикиләргә хәвәрләндүрүш һоқуқидин мәһрум қалған. У, талада 15 минут һавалиниш әркинликидинму мәһрум қилинғиниға наразилиқ билдүрүш үчүн мәһбустәк соланған ялғуз камерда авазиниң баричә варқириған. "мәркәз" ниң сақчи башлиқи бу сәвәблик уни бир сотка ач қойған.

Бу хил роһий вә җисманий зулумлардин һалсирап, өмүрбәгниң қан бесими өрләп кәткәнликтин, даириләр уни айрим қамақтин йәнә илгирики опчә ятиқиға елип чиқишқа мәҗбур болған. Шу чағдила у ятақдашлириниң өз тамақлиридин униңға қисинип йиғип сақчидин киргүзгән болсиму, әмма хитай сақчиниң шу тамақни өмүрбәгкә бәрмәй, төкүвәткәнликини билгән.

Гәрчә өмүрбәг "тәрбийәләш мәркизи" дә даириләрниң мушундақ хорлуқлири вә зулумлириға учриған болсиму, әмма у бу җайда өзигә охшаш бигунаһ һалда мәҗбурий соланған кишиләрдики инсаний муһәббәт, пидакарлиқ вә қериндашлиқ меһир-шәпқәтни һес қилған.

Миңлиған бигунаһ инсанларға мәҗбурий вә мәнтиқсиз һалда "вәтәнпәрвәрлик тәрбийәси" елип бериливатқан бу қараңғу җайдин омүрбәгниң 20 күн болғанда қутулуп чиқишиниң өзи бир мөҗизә. Өмүрбәг "тәрбийәләш мәркизи" дин қутулғинида "хитай даирилири үстидин чоқум әрз қилип, тартқан бәдәллиримниң адалитини тәләп қилимән" дегән толуп ташқан қисаскарлиқ роһи билән чиққан. Һалбуки, у гөрүгә елинған ата-ана, уруқ-туғқанлириниңму өзигә охшаш зиянкәшликигә учришидин сақлиниш үчүн үн-түнсиз қазақистанға қайтип кәлгән.

Өмүрбәг өз аилиси вә қазақистандики қериндашлириниң көрсәткән тиришчанлиқи түрткисидә шундақла қазақистан-хитай арисидики дипломатийәлик учришишлар нәтиҗисидә хитайниң искәнҗисидин қутулуп қазақистанға қайтип келәлигән. Өмүрбәг әли бешиға қара халта кийдүрүлүп пут қолиға кишән селип мәҗбурий түрмигә қамалғандиму, айларчә түрмидә йетип талай қетим тәһдит, қийин-қистаққа учриған чағлиридиму һеч бир заман йиғлап бақмиған. Әмма у қериндашлириниңму өзигә охшаш тәқдиргә йүзлиниватқанлиқини көргинидә ихтиярсиз көз яшлирини туталмиған. . .

Биз сөһбитимизни бүгүн мушу йәрдә тохтитишни тоғра таптуқ. Өмүрбәгниң саламәтлики аста-таста әслигә кәлмәктә, йүрәк ярилириму сақаймақта. Әмма униң әмди "адаләт үчүн җени пида". Ундақта, әркинликкә чиққан өмүрбәг кейинки қәдәмдә өзиниң һәқ һоқуқи, қериндашлириниң тәқдири шундақла адаләт үчүн немиләрни қилишни ойлаватиду? буни кейинки сөһбитимиздә өмүрбәгниң баянлиридин билгәйсиз.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт