Ikki balining dadisi abdughappar abdujappar “Terbiyelesh lagéri” da hayatidin ayrilghan

Ashkarilinishiche ghulja shehirining bayanday yéza ikkinchi kent ezasi, 34 yashliq ashpez abdughappar abdujappar ötken yili 6‏-ayda ghulja sheherlik maliye mektipide tesis qilin'ghan “Yépiq terbiyelesh lagéri” gha élip kétilgen.

Abdughappar bu yerde 6 ayche qamalghandin kéyin salametlikide mesile körülüp, ghulja sheherlik xelq doxturxanisigha apirilghan we u yerde hayatidin ayrilghan. Melum bolushiche, bu bayandaydiki yerlik ahalilerdin “Yépiq terbiyelesh lagéri” da ölgenlerning tunjisi emes iken.

Anglighuchilirimizdin biri radiyomizgha inkas yollap, ghulja shehirining bayanday yézisida 60 nechche yashliq bir ayalning “Terbiyelesh” te jan üzgenlikini melum qildi. Éniqlashlirimiz dawamida, neq shu weqening tepsilati aydinglashmighan bolsimu, emma buninggha oxshash yene bir weqening bayanday ikkinchi kentte yüz bergenliki delillendi.

Melum bolushiche, bultur 6‏-ayda “Terbiyelesh lagéri” gha ekétilgen 34 yashliq abdujappar abdughappar bu yil kirishtin bir hepte burun, yeni ötken yili dékabirning axiri hayatidin ayrilghan.

Kent we mehelle mudirliri, abdughappar abdujapparning “Terbiyelesh” ke apirilishtin burunqi salametlik ehwali, uning “Terbiyelesh lagéri” din doxturxanigha élip bérilishige némining seweb bolghanliqi heqqide melumat bérelmidi.

Bu peqet ghulja shehirining bayanday yéza ikkinchi kentige a'it melumat. Ötken qétim yéngisardin ehwal igilishimiz dawamida saghan yézisidinla 3 ay ichide 4 kishining “Yépiq terbiyelesh lagéri” din jesiti chiqqanliqi melum bolghan idi.