Күнәс наһийәсидә йәр дәваси қилған уйғур деһқанлириға "террорчи" қалпиқи кийгүзүлгән

Мухбиримиз қутлан
2014-05-02
Share
Qeshqer-Qaziriq-yer-dewasi-barmaq.jpg Қәшқәр қазириқ 14-кәнт деһқанлириниң бармақ бесип һөкүмәткә йоллиған әрзи.
RFA/Qutlan


Күнәс наһийәсиниң тоқай кәнтидики уйғур деһқанлириниң еғир қисмәтлири нөвәттә уйғур елидики деһқанлар дуч келиватқан йәр мәсилисиниң һәқиқий маһийитини көрситип бәрмәктә.

Күнәс наһийәлик партком вә сиясий қанун комитетиниң зораванлиқиға чидимай, бирқанчә йиллардин буян әрз қилишни давамлаштуруп кәлгән тоқай кәнтиниң деһқанлар вәкили һашимҗан авут радиомиз арқилиқ йәрлик деһқанларниң авазини аңлатти.

Йәрдин айрилдуқ, бинадин өй сетивелишқиму қурбимиз йәтмиди

15 Күнлүк солақтин әмдила бошинип чиққан деһқанлар вәкили һашимҗан авут зияритимиз җәрянида мунуларни билдүрди:

"партком секритари җя йишеңниң буйруқи билән биздин мәҗбурий тартивелинған йәрләр шәхсий қурулуш ширкәтләрниң хоҗайинлириға йоқири баһада сетип берилмәктә. Улар әслидики наһийәлик партком, һөкүмәт, сот вә башқа идариләрниң селинғиниға узақ болмиған биналирини вә униң тегини шәхсий ширкәтләргә йоқири баһада сетип бир пайда алди. Андин шәһәрни кеңәйтимиз, һөкүмәтниң хизмәт биналирини йеңилаймиз дәп, бизниң кәнтниң йәрлирини тартивелип қурулуш қиливатиду. Униң пайдисини йәнә шу әмәлдарлар еливатиду. Бизниң йәрлиримизни алғичә улар бизгә бинадин йеңи өй беримиз дәп хәлқни алдиди, лекин ахири берип бина өйләрниң һәр квадрат метириға 1500 сомдин пул төләйсиләр дәп турувалди. Әгәр 100 квадрат метирлиқ өй сетивалсақ баһаси 150 миң сом болидикән. Деһқанларниң йәрлирини һәр мосиға аран 25 миң сом берипла тартивалди. Бир җанниң йери адәттә икки йерим мо, униңға аран 63 миң сом пул берипла еливалған турса, өзиңиз ойлап беқиң, биз қандақму бинадин 150 миң сомға өй сетивалалаймиз!? йеримиздин айрилмақтимиз, әмма бинадин өй сетивелишқиму қурбимиз йәтмәйватиду."

Биз 17 деһқанни бирақла тутуп солиди, укам қаттиқ таяқ йиди!

Һашимҗан авут мундақ деди:

"деһқан дегән йәрдин айрилса қандақ күн алиду? бизниң бала - чақилиримиз қандақ яшайду? бу қетим кәнтимиздики деһқанлар бирақла көтүрүлүп чиқти. Наһийәлик сиясий қанун комитетиниң секритари шү вейчаң сақчиларни ишқа селип биз 17 деһқанни бирақла тутуп 15 күндин солиди. Укам өз йеридики көчәтлирини кесиватқанда шү вейчаң сақчи башлап келип укамни тутуп сақчиханиға апирипту - дә, қаттиқ урупту. Һазир кәнтимиздә таяқ йемигән, уруп - соқулмиған кишиләр йоқ дейәрлик."

У йәнә мунуларни тәкитлиди:

"шу вәҗидин, биз қечип йүрүп әрз қилишни давамлаштурдуқ, үрүмчи вә бейҗиңларғичә қечип берип әрз қилдуқ. Каллимиздин өтмигән йери шуки, аптоном районлуқ земин байлиқ идарисиму бизниң наһийә әмәлдарлириниң йәрлиримизни тартип елип қурулуш қилишиға тәстиқ сапту. Биз дәрдимизни кимгә ейтимиз? мән деһқанларға вәкил болуп йәр дәваси қиливатқили бирқанчә йиллар болди, бу қетим ака - ука үчимиз бирақла солақта йетип чиқтуқ, мениң билән биллә йәр дәваси қиливатқан бир туңганму бар. Уму илгири - кейин болуп 3 қетим солақта йетип чиқти."

Кәнт секритари ли җү өз янчуқини толдуриватиду

Һашимҗан зияритимиз җәрянида төвәндики әһвалларни мәлум қилди:

"бу ишларниң һәммиси кәнтимизниң секритари ли җүниң қоли билән елип берилди. Деһқанлардин тартивелинған йәрләргә қурулуш башлиғичә бирқанчә йиллар қуруқ турди. Бу йәрләрни кәнт секритари ли җү сирттин кәлгән хәнзуларға иҗаригә берип пайдисини өз янчуқиға салди. Бир қисим деһқанлар қийинчилиқ сәвәбидин кәнткә һал ейтип барса, у, йәрлириңларни маңа сетип бериңлар дәп деһқанларни алдап, һәр мо йәргә 5 миң сомдин 16 миң сомғичә пул берип йәрни еливалди. Андин бу йәрни наһийәниң йеңидин кеңийиватқан тәрәққият райониға һөкүмәт өлчими бойичә мосини 25 миң 500 сомдин сетип пайдисини өзи көрди."

У мундақ бир қошақ арқилиқ тоқай кәнттики деһқанларниң нөвәттики еғир әһвалини тәсвирлиди:

Пуқра қилип дәвани,

Чечи чүшүп болди таз.

Бәгләр әйш - ишрәттә,

Дәпн қилар челип саз.

Әмди бизгә "террорчи" қалпиқини кийгүзүватиду

Һашимҗан авут ахирида мунуларни билдүрди:

"бу йил 1 - айда әрз қилиш үчүн үрүмчигә маңған идуқ, бизни күнәс наһийәсиниң чиқиш еғизи болған чазида сақчилар тосувалди. Улар бизни аптобустин чүшүрүп қолимизни дүмбимизгә қайриған пети сақчиханиға елип барди вә кимликимизни тартивалди. Мана һазирғичә йерим йил болай деди, кимликимиз йоқ, һечйәргә чиқалмайватимиз. Аңлисақ, бизни наһийәлик партком һазир"террорчи" дегән қалпақ билән әйибләветипту. Һөкүмәттә ишләйдиған сиңлим бар иди. Уни кимликимни сорап бақ дәп шү вейчаңниң ишханисиға әвәткән идим. Сиңлим берип сориса, акаң террорчи, униң кимликини беришкә болмайду дәпту."

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт