Qeshqer nezerbagh déhqanliri térilghu yerliridin ayrilip qalmaqta

Muxbirimiz qutlan
2014.03.26
Share on WhatsApp
Share on WhatsApp
Qeshqer-Qaziriq-yer-dewasi-barmaq.jpg Qeshqer qaziriq 14-kent déhqanlirining barmaq bésip hökümetke yollighan erzi.
RFA/Qutlan

Igilishimizche, qeshqer sheher nezerbagh yéza yuqiriqi qaziriq 14-kent déhqanliri 2002-yilidin buyan 5000 mo térilghu yéridin ayrilip qalghan.

Melum bolushiche, qaziriq déhqanliri ata-bowiliridin tartip özlirige tewe munbet térilghu yerliride tirikchilik qilip kelgen. 1980-Yillardin kéyin kent tewesidiki térilghu yerler déhqanlargha teqsim qilip bérilgen. 1986-Yiligha kelgende üstün atushtin bu yergiche éqip kélidighan chaqmaq deryasining süyi zor derijide azayghan. Bolupmu qeshqer ayrodromini kéngeytip yasash qurulushi qaziriq kentining térilghu yerlirini taraytiwetken we pütün kent yerlirini ikkige bölüwetken. Buning bilen déhqanlarning normal qatnishi adettikidin 8 kilométir uzirip ketken.

2002-Yiligha kelgende qeshqer shehiri térilghu yerlerni salalashturimiz dep kent tewesidiki 3200 nopustin, her bir jan béshigha 40 ywendin pul yighiwalghan. Shu yilining axirigha barghanda sheherlik hökümet qeshqer ayrodromining shimalidiki qaziriq kentige tewe 5000 mo térilghu yerni mejburiy éliwalghan. Déhqanlar qarshiliq bildürgende “Kökertish élip bérip ayrodromni güzelleshtürimiz” dégen bahane bilen déhqanlarning erzige perwa qilmighan.

Buning bilen qaziriq kentining qeshqer ayrodromining shimalidiki 7400 mo térilghu yéri aziyip aran 2400 mogha chüshüp qalghan. Hazir kenttiki 4400 nopus, yeni 700 nechche a'ile aran 2400 mo yerge tayinip tirikchilik qilmaqtiken.

Qaziriq déhqanlirining Uyghur aptonom rayonluq hökümetke sun'ghan erz xétidin melum bolushiche, 2002-yili 4-ayda qeshqer sheherlik hökümet heqsiz igiliwalghan 5000 mo yerdin 864 mo yerni qeshqer shehiri shénjén tereqqiyat rayonigha satqan. Bu sodini sheherlik hökümetning buyruqi boyiche nezerbagh bazarliq hökümet öz üstige élip toxtam tüzgen. Eyni waqitta qaziriq déhqanlirining éghizini tuwaqlash üchün bazarliq hökümet öz aldigha sétiwetken 864 mo yer üchün kenttiki 3200 nopusqa aran 1500 ywendin toluqlima pul bérip ishni tügetken.

Térilghu yerliri zor derijide aziyip turmushi qiyinlashqan qaziriq déhqanliri 10 yildin kéyin ishning tégige yétip erz qilishqa bashlighanda héchkim ularning dad-peryadini anglimighan.

2012-Yili 12-ayda qaziriq déhqanliri nezerbagh bazarliq hökümet, qeshqer sheherlik hökümet we qeshqer wilayetlik memuriy mehkimige köp qétim erz sun'ghan bolsimu, lékin ularning erzi birdek ret qilin'ghan.

Qeshqerde amal qilalmighan déhqanlar axiri 2013- yili 2-ayda ürümchige bérip erz qilghan. Shu yili 3-ayda qaziriq kent sékrétari muxter tursun bilen nezerbagh yéza bashliqi alim ürümchige bérip “Bu ishni biz hel qilimiz” dep erzdar déhqanlarni qayturup kelgen. Déhqanlar wekilliri ürümchidin qaytip kélip bir hepte ötkende bazarliq hökümet ularning qolidiki erz matériyalliri we delil-ispatlarning esli nusxisini tartiwélip hazirghiche qayturup bermigen.

Biz bu heqte ehwal igilesh üchün qeshqer nezerbagh yéza yuqiriqi qaziriq 14-kenttiki déhqanlargha téléfon qilduq. Ziyaritimizni qobul qilghan déhqan ayal aman'gül bu ehwallarning rastliqini delillidi.

Uning bildürüshiche, nezerbagh bazarliq hökümetning emeldarliri yuqiriqi qaziriq kentining sékrétari bilen birliship, déhqanlarning raziliqisiz kent tewesidiki térilghu yerlerni sétiwetken. Ular hetta qeshqer sheher shénjén tereqqiyat rayonigha satqan 864 mo yerning tölem pulini déhqanlargha bermigen.

Igilishimizche, hazir qaziriq déhqanlirining yer dewa ishi yuqiri pellige chiqip, déhqanlar terep-tereptin yardem izdeshke bashlighan. Hetta bu ishni torgha élan qilip jama'et pikri hasil qilghan. Bu ishning ashkara bolup kétishi we uning éghir mes'uliyitidin qachqan nezerbagh bazarliq hökümet emeldarliri saqchixana xadimlirini ishqa sélip déhqanlar wekillirini nezerbend qilghanliqi melum bolmaqta.

Bu heqtiki tepsiliy melumatlar dawamliq diqqitinglarda bolidu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.